OBAMA LAVROVLA AZƏRBAYCANI MÜZAKİRƏ ETDİ

ABŞ prezidenti Rusiya xarici işlər naziri ilə Dağliq Qarabağ məsələsi və Qəbələ RLS barədə danışıqlar aparıb



Mayın 6-da Vaşinqtona səfər edən Rusiya xarici işlər naziri Sergey Lavrov dünən Ağ Evdə prezident Barak Obama ilə görüşüb. Rusiya KİV-lərinin xəbərlərinə görə, Obama Lavrovu Bakı vaxtı ilə gecə saatlarında qəbul edib. Ağ Ev bu görüşdə hansı məsələlərin müzakirə olunacağı haqda açıqlama verməyib.
Lakin Moskvadakı diplomatik mənbələr bildiriblər ki, xarici işlər naziri ABŞ prezidenti ilə ikitərəfli münasibətlərə dair geniş spektrdə məsələləri müzakirə edilib. Bura ABŞ-la Rusiya arasında strateji hücum silahlarının ixtisarına dair yeni müqavilənin hazırlanması, raketdən müdafiə sistemləri qurulmasında əməkdaşlıq imkanları, Cənubi Qafqazdakı vəziyyət və Dağlıq Qarabağ münaqişəsi daxildir.
Xəbərlərə görə, Rusiya nüvə başlıqlarının sayının 1700-dən 1500-ə qədər endirilməsi təklifinə razıdır, ancaq bildirir ki, nüvə başlıqlarının sayı müəyyən edilərkən təkcə döyüş növbəsində dayanan başlıqlar deyil, anbarladakı başlıqlar da nəzərə alınmalıdır. Hazırda ABŞ-la Rusiyanın cəmi 10 minə yaxın nüvə başlığı var. ABŞ dövlət katibinin silahlara nəzarət üzrə köməkçisi Rouz Gettemüller bildirib ki, tərəflər nüvə başlıqlarının sayının ixtisarında həmfikirdirlər. Eyni zamanda diplomat ABŞ-la Rusiyanın raketdən müdafiə sistemləri qurulmasında da əməkdaşlıq edə biləcəklərini deyib. Onun sözlərinə görə, belə əməkdaşlıq üçün Azərbaycan ərazisindəki Qəbələ RLS-dən birgə istifadə təklifi çox maraqlıdır. Xatırladaq ki, Buş administrasiyası Rusiyanın bu stansiyadan istifadə təklifini qəbul etməmişdi.

Xəbər xidməti