6209 gün Şuşasız

İşğal olunmuş torpaqlarımız ancaq ildönümdən ildönümə yada düşür. Şuşa da istisna deyil. Bu gün bir sıra təşkilatlar əvvəlki illərdə olduğu kimi, yenə Şəhidlər Xiyabanını ziyarət edəcək, tədbirlər keçirəcək, TV-lərimiz Şuşayla bağlı bir-iki veriliş nümayiş etdirəcək, sonra...

Bir il də ötdü Şuşasızlığımızdan. Hər gün Şuşaya qayıdacaqlarını gözləyənlər, bu günü də hesablasaq, düz 6209 gündür ki, Şuşasızdırlar. "Şuşasız bir gün yaşaya bilmərəm" deyənlər 17 ildir ki, Şuşasız qalıblar. Biz burda Şuşasızlığın növbəti ildönümünü qeyd edirik, ermənisə orda Şuşanı işğal etməyinə bayram keçirir. Görəsən, biz nə vaxt qələbə gününü qeyd edəcəyik?!
Bu gün Şuşanın işğalı günüdür. Dağlarının başı dumanlı, "qırmızı koftalı, yaşıl tumanlı" Şuşanın işğalından 17 il keçir. Bir igidin ömrüdür, 17 il. 17 il də vətənsiz, el-obasız qalmaq olar?! Amma olarmış! Bəlkə də Şuşanın bağlı-baxatlı vaxtlarında o yerlərdə yeyib-içib, kef çəkənlərin indi heç yadına Şuşa düşmür. Ymumiyyətlə, "Şuşa nə vaxt işğal olunub" sualıyla sorğu keçirilsə, "1992-ci il, mayın 8-də" cavabını verənləri barmaqla saymaq olar. Necə ki, təxminən 3 ay əvvəl özündən başqa bir ünlü sənətçi tanımayan Ylvi Qılıncdan "Azərbaycan torpaqlarının neçə faizi işğal altındadır" soruşanda, adam qılıncını çəkib "30 faiz" cavabını vermişdi. Elə bilirsiniz, o biri müğənnilərimiiz ondan geri qalırlar?
İşğal altında olan torpaqlarımız ancaq ildönümlər ərəfəsində yada düşür. Şuşa da istisna deyil. Bu gün bir sıra təşkilatlar əvvəlki illərdə olduğu kimi, yenə Şəhidlər Xiyabanını ziyarət edəcək, tədbirlər keçirəcək, TV-lərimiz Şuşayla bağlı bir-iki veriliş nümayiş etdirəcək, sonra... Sonra hər şey unudulacaq. Şuşa bir də gələn il yada düşəcək (Allah qismət eləsin, Şuşasızlığın ildönümləri elə bu illə bitsin). Əmin olun ki, televiziyalarımızın axşam efirini yenə çal-çağır, düşük-düşük verilişlər "bəzəyəcək". Həftə səkkiz, mən doqquz kimlərəsə xoş gəlmək üçün xüsusi buraxılış hazırlayan qəzetlər niyə Şuşayla bağlı buraxılış demirəm, heç olmasa, bircə səhifə ayırmırlar?
Ermənilər işğal etdikləri bütün rayonlar kimi Şuşanı da viran qoyurlar. Şuşada Qalalıq bir şey qoymayıb düşmən. Xarı bülbül də bitmir indi Şuşada. Topxana meşəsindən əsər-qalmayıb; meşənin qoruq zonasında, lap hündür yerində meşə sahəsi qırılaraq geniş düzənlik açılıb və orada tikintilər inşa olunub. Bizim gücümüzsə hələ ki, ildönümləri keçirməyə çatır. Donuz darıdan xoşhaxoşluqla çıxmayan kimi ermənilər də işğal etdikləri torpaqlardan elə-belə çıxana oxşamırlar. Amma səbr kasasının daşması da var. Buna az qalıb, lap az.
Bu gün ən çox səslənən mahnı "Şuşanın dağları" olacaq.
Şuşanın dağları başı dumanlı,
Qırmızı koftalı, yaşıl tumanlı...

Qalib