Qəbələdə 2000 il əvvələ aid ictimai binaların qalıqları aşkarlanıb

Qəbələdə 2000 il əvvələ aid ictimai binaların qalıqları aşkarlanıb

Qəbələdə antik dövr və orta əsrlər dövründəki şəhərin xarabalıqlarında bir ay müddətində aparılan arxeoloji qazıntılar yekunlaşıb. Bu barədə APA-ya açıqlamasında ərazidə tədqiqat aparan elmi ekspedisiyanın rəhbəri İlyas Babayev məlumat verib. O, antik dövr şəhər xarabalıqlarında böyük ictimai binaların qalıqlarının aşkarlandığını deyib: “Bu binalar eramızın əvvəllərinə, yəni bizim eranın I əsrinin sonuna, 2000 il bundan əvvələ aiddir. Şəhərin lap alt qatlarında isə böyük taxıl anbarı, 30-dan çox yerə basdırılan küp tapılıb”. Tədqiqat zamanı Oğuz-Qəbələ-Bakı su kəmərinin Qəbələnin yanından keçən hissəsində torpaq qəbirləri aşkarlanıb: “Orta əsrlər dövründəki şəhərin xarabalıqlarında aparılan geniş qazıntılar nəticəsində şəhərin su təchizatı ilə əlaqədar materiallar, yerli və Çindən gətirilən qab-qacaqlar üzə çıxarılıb”.