ERMƏNİSTAN QARABAĞA GÖRƏ RUSİYADAN DƏSTƏK İSTƏYİR

Serj Sarkisyan Azərbaycan rəhbərliyinin mövqeyini bəyənir


C.MƏMMƏDOV


Ermənistan prezidenti Serj Sarkisyan rusiyalı həmkarı Dmitri Medvedyevlə görüşü zamanı Dağlıq Qarabağ münaqişəsinin nizamlanmasında Kremlin Yerevana göstərəcəyi perspektiv dəstəklə bağlı fikir mübadiləsi aparılıb. Rusiya mətbuatının yazdığına görə, Yerevan məsələ ilə bağlı Moskvadan dəstəyini artırmağını istəyib.
Son günlər yayılan məlumatlara görə, Rusiya müəyyən siyasi və iqtisadi məsələlərdə Azərbaycanla yaxınlaşma siyasəti yeridir. Xüsusilə Azərbaycan prezidenti İlham Əliyevin bu yaxınlarda Moskvaya səfəri zamanı səsləndirilmiş bəyanatlar erməni tərəfinin xüsusi narahatlığına səbəb olub. Qeyd edək ki, Azərbaycan - Rusiya prezidentlərinin Moskva görüşünün nəticələri mətbuatda "Qaz əvəzinə Qarabağ" kimi yozumlanmışdı.
Əldə edilən məlumatlara görə, Sarkisyan Medvedyevlə görüşündə iki ölkə arasındakı münasibətlərin hazırkı durumunun vəziyyəti diqqət mərkəzində olub. Rusiya prezidenti erməni həmkarını əmin edib ki, Moskva Yerevanı dəstəkləməkdə davam edəcək.
Yeri gəlmişkən, bu günlərdə Sarkisyan "World Street Yournal"a (WSY) və "Russia Today" kanalına müsahibə verib. "Ərdoğanın bəyanatı Türkiyə ilə Ermənistanın razılaşmaları çərçivəsində olmayıb. Çünki danışıqlar şərt qoyulmadan gedib" - deyə o Türkiyənin baş naziri Racib Tayyip Ərdoğanın Qarabağ problemi həll olunmayınca sərhədlərin açılmayacağı barədə bəyanatına dair sualına cavabında deyib. S.Sarkisyan hesab edir ki, şərt qoymaq qətiyyən məqbul deyil. O deyib ki, top indi Türkiyənin meydançasındadır, Ermənistan Türkiyədən cavab gözləyir. Bununla da Sarkisyan Türkiyə qarşısında şərt qoyub, Erməni prezident bildirib ki, o, Türkiyəyə yalnız o zaman gedəcək ki, sərhədlər açılsın. "Mən Gülü Yerevana dəvət edəndə Türkiyəyə cavab səfərini sadəcə turist və ya futbol azarkeşi kimi etməyi düşünmürdüm", - deyə o qeyd edib. Dərginin əməkdaşının "sizin üçün hansı daha vacibdir - Amerikanın "soyqırım"ı tanıması, yoxsa Türkiyə ilə sərhədlərin açılması" sualına cavabında Sarkisyan bildirib: "ABŞ özü nə vaxt lazım bilsə, soyqırımı tanıyacaq. Biz kimisə milli maraqla mənəvi mövqe dilemmasına itələmirik. Biz istəmirik ki, soyqırım məsələsi Türkiyə ilə münasibətlərə əngəl olsun".
Sərhədlərin açılması ilə bağlı Azərbaycanın narahatlığı barədə suala cavabında Sarkisyan qeyd edib: "Mən əminəm ki, danışıqlara başlayanda Türkiyə də Azərbaycanın reaksiyasını hesablayırdı. Mən inanmıram ki, Türkiyədə kimsə Azərbaycanda kiminsə bunu alqışlayacağını düşünürdü. Mən Türkiyənin geri çəkilməsinə Azərbaycanın səbəb olmasını başa düşə bilmirəm. Bu danışıqlardan Azərbaycanın narahatlığı da şişirdilib. Sərhədlərin açılmağı ilə Ermənistanın Qarabağ probleminin həllinə yanaşması dəyişmir. Türkiyə ilə münasibətlərin yoxluğuna baxmayaraq və ya Ermənistanda iqtisadi vəziyyət nə qədər çətin olursa-olsun və yaxud hər hansı bir səbəbdən və ya nəyə görəsə elə bir Ermənistan lideri tapmazsız ki, Dağlıq Qarabağın Azərbaycana verilməsinə kağızda imza atsın, ya da bunu ağlına gətirsin. Qarabağ probleminin kökündə duran əsas məsələ Dağlıq Qarabağ əhalisinin öz taleyini özünün müəyyən etməsi haqqıdır". Qarabağın Azərbaycanın olmadığını bildirən Sarkisyan qeyd edib ki, o, Sovet dövründə Kommunist Partiyasının qərarı ilə Azərbaycanla birləşdirilib.
Sarkisyan may ayında Praqada keçiriləcək Avropa Birliyinin Yaxın Şərq Əməkdaşlığı proqramı üzrə danışıqlarda Azərbaycan prezidenti İlham Əliyevlə danışıqlarda real tərəqqiyə başlamağın mümkün olduğunu bildirir. "Biz hazırda Minsk Qrupunun prinsipləri üzrə işləyirik, bunlara ərazi bütövlüyü və öz müqəddəratını özünün müəyyən etməsi haqqı da daxildir. Əgər İlham Əliyev bu prinsiplər əsasında danışıqları davam etdirməyə hazırdırsa, biz hazırıq".
S.Sarkisyan Azərbaycanın müdafiə sektoruna və hərbi texnikanın alınmasına çoxlu pul xərcləməsindən narahat olduğunu bildirib: "Ancaq Ermənistan ordusuna kifayət qədər və ciddi vəsait qoyuruq".
S.Sarkisyan "Russia Today" kanalına bildirib ki, artıq münaqişənin nizamlanması ilə bağlı bütün prosesi sürətləndirmək və qərarlar qəbul etmək zamanı çatıb. S.Sarkisyan son vaxtlar Azərbaycanın Qarabağ münaqişəsinin nizamlanmasındakı mövqeyində dəyişikliklər olduğunu qeyd edib. Onun sözlərinə görə, Azərbaycan rəhbərliyi əvvəllər Dağlıq Qarabağ probleminin yalnız ərazi bütövlüyü çərçivəsində və ya hərb yolu ilə həll ediləcəyini bəyan edirdi. "Mən şadam ki, son vaxtlar Azərbaycan rəhbərliyi problemin bütün beynəlxalq prinsiplərlə nizamlanmasından danışmağa başlayıb".