“Ərdoğan azərbaycanlı millət vəkillərindən üzr istəməlidir”

Türkiyənin baş naziri Rəcəb Tayyib Ərdoğan Azərbaycan parlamentinin qadın millət vəkillərindən üzr istməlidir. RİA-nın məlumatına görə, bu barədə Milli Məclisin bu gün keçirilən iclasında Bütöv Azərbaycan Xalq

Cəbhəsi Partiyasının sədri, millət vəkili Qüdrət Həsənquliyev məsələ qaldırıb.

“Milli Məclisin beynəlxalq əlaqələr şöbəsi Türkiyə hökuməti ilə əlaqə saxlamalı, Ərdoğan üzr istəməlidir. Üzr istəməsə, dediyi sözləri onun özünə aid etmək lazım gələcək”, - deyə Həsənquliyev bildirib.

Xatırladaq ki, Azərbaycanın bir sıra qadın millət vəkilləri aprelin 18-də Türkiyə-Ermənistan sərhədlərinin açılması məsələsi ilə bağlı Ankaraya səfər ediblər. Millət vəkiloləri səfər çərçivəsində bir sıra hökumət və müxalifət nümayəndələri ilə görüşüblər.

Rəcəb Tayyib Ərdoğan televiziya ilə çıxışında bildirib ki, bəzi şəxslər Azərbaycandan Türkiyəyə, bəziləri isə buradan ora getməklə aranı qarışdırmağa çalışırlar. Yüksək dövlət məmurlarının onların mövqeyini dəstəkləməsi isə üzücü hadisədir.

Milli Məclisin sədri Oqtay Əsədov Ərdoğanın çıxışında heç bir təhqiramiz iafdə olmadığını bildirib. “Ərdoğanın çıxışına mən də qulaq asmışam. Belə bir şey eşitməmişəm. Ərdoğan millət vəkillərini təhqir etməyib. Sözlərinə fikir ver, məsələləri qızışdırmaq lazım deyil. Bizim millət vəkilləri öz fikirlərini, Ərdoğan da öz fikirlərini deyib. Əlavə bir söz deyilməyib”, - deyə sərd əlavə edib.

Ümid partiyasının sədri, millət vəkili İqbal Ağazadə isə bəzi sahələrdə büdcə təşkilatlarında işləyənlərin bir neçə aydır əmək haqqı almadığını deyib. Onun sözlərinə görə, əmək haqqını istəyən şəxsi işdən çıxarmaqla hədələyirlər.

Spiker Oqtay Əsədov büdcə təşkilatlarında əmək haqqının önəliməsi ilə bağlı heç bir problem olmadığını deyib.

Ana Vətən Partiyasını təmsil edən deputat Zahid Oruc isə Xocalı soyqırımı günü ilə bağlı ABŞ Prezidentinin müraciətlə çıxış etməsini vacib olduğunu deyib. “Bunun üçün Azərbaycandan ABŞ Prezidentinə çoxlu müraciətlər ünvanlanmalıdır. Biz hətta elə etməliyik ki, gələn il fevralın 26-da Xocalı soyqırımı ilə bağlı Obama Azərbaycan dilində müraciət etsin”, - deyə Zahid Oruc bildirib.

Onun fikrincə, Azərbaycan cəmiyyəti də bu ABŞ Prezidentinin müraciətinə münasibət bildirilməlidir. “Prezident Barak Obamanın qondarma "erməni soyqırımı" ilə bağlı müraciətində Türkiyə ilə Azərbaycanın ümumi siyasətinə mənfi təsir edəcək məqamlar var. Bu müraciət ermənilərin Qarabağ məsələsində mövqeyini gücləndirəcək”, - deyə Zahid Oruc vurğulayıb.

Milli Məclisin spikeri Oqtay Əsədov isə Obamanın qondarma erməni soyqırımı ilə bağlı müraciətini ermənilərin və onların xaricdəki diasporlarının daha aktiv və güclü işləməsi ilə əlaqələndirib.

Müsavat deputat qrupundan olan millət vəkili Pənah Hüseyn 1 Mayın Əmək Bayramı və qeyri-iş günü hesab edilməsi ilə bağlı MM-ə qanun layihəsi təqdim etdiyini deyib. Millət vəkili qanun layihəsinin baxılmasını təklif edib. Eyni zamanda Pənah Hüseyn, Qarabağla bağlı gedən proseslər barədə də sənəd hazırladığını, layihənin deputatlara paylanıb müzakirə olunmasını istəyib.

O. Əsədov “1 May bayramıını sizin hakimiyyət ləğv edib”, - deyə deputatın təkilifinə münasibət bildirib.


Ria.Az