Dəniz Baykal Azərbaycan xalqından üzr istəyib

Ankara – APA. “Ermənistan Türkiyə ilə razılaşdırılan “yol xəritəsi”ndə Dağlıq Qarabağ münaqişəsi və Azərbaycanla bağlı hər hansı məqamın olmadığını, Türkiyə ilə bu məsələnin müzakirə edilmədiyini qətiyyətlə bildirir.

Biz isə Ermənistanla münasibətlərimizi Barak Obamanın 24 aprel çıxışı ilə əlaqələndiririk - onun mesajına təsir göstərmək üçün. Amma indiyədək etdiyimiz ən böyük güzəştə, Ermənistanla qeyd-şərtsiz danışıqlara getməyimizə baxmayaraq, ABŞ prezidentinin mövqeyinə təsir göstərə bilmədik, üstəlik Azərbaycanla münasibətlərimiz pozulmağa başladı”. APA-nın xəbərinə görə, bu sözləri Türkiyə Cümhuriyyət Xalq Partiyasının lideri Dəniz Baykal partiyasının parlament fraksiyasının toplantısındakı çıxışında deyib. Hökumətin Ermənistanla əldə etdiyi və aprelin 22-də gecə açıqlanan razılığın ABŞ prezidentinin mövqeyinə təsir göstərmədiyini, əksinə, Barak Obamanın uydurma “soyqırım” mövzusunda əvvəlki ABŞ prezidentlərindən daha kəskin mesaj verdiyini söyləyən D. Baykal Azərbaycanın təkcə hakimiyyətində deyil, cəmiyyətində də Türkiyəyə münasibətdə inciklik yarandığını vurğulayıb: “Azərbaycanlılar bunu dostca, qardaşcasına ifadə ediblər. Baş nazir Ərdoğan isə bu narazılıqlarla bağlı ittiham mövqeyindən çıxış edərək bura gələn Azərbaycan millət vəkillərini fitnəkar ünsürlər adlandırıb. Bu, Türkiyə Cümhuriyyətinin baş nazirinə yaraşmaz. Baş nazirin bu sözlərinə görə, Azərbaycan xalqından üzr istəyirəm. Biz onların fitnə içində olmadığını, sadəcə, inciklik, küskünlük duyduğunu bilirik, bunu anlayırıq. Amma bu inciklik və küskünlüyü də böyütməyə ehtiyac yoxdur. Bilsinlər ki, AKP bu gün var, sabah yoxdur, bunlar müvəqqətidir, Türkiyə-Azərbaycan dostluğu isə əbədidir”.

R. T. Ərdoğanın xarici siyasətini kəskin tənqid edən Türkiyə ana müxalifət lideri bəyan edib ki, bu hökumət nə vaxt masaya oturursa, ayağa qalxdıqda cibi boşalmış olur: “Baş nazir xarici siyasətdə “qazan-qazan”, yəni hər iki tərəfin də qazanc əldə etməsi prinsipindən çıxış edir. Amma aparılan müzakirələrin nəticəsi “qazan-itir” olur və təəssüf ki, itirən tərəf də hər zaman Türkiyə olur”.