"Manas" əldən çıxdı

"Manas" əldən çıxdı
ABŞ yenə Özbəkistanla anlaşmağa çalışacaq

"Qırğızıstan hakimiyyət orqanlarının "Manas"dakı Amerika hərbi bazasını başlamaq qərarı təəssüf doğurur, lakin bu addım Birləşmiş Ştatların Mərkəzi Asiyada aktiv fəaliyyətinə mane olmayacaq".
Bu bəyanatla ABŞ-ın dövlət katibi Hillari Klinton çıxış edib. Fransanın xarici işlər naziri Bernard Kuşnerlə birgə brifinq keçirən xanım Klinton bildirib ki, "Manas" bazasının bağlanması ABŞ_ın Əfqanıstandakı qoşunlarının mövqeyinə təsir göstərməyəcək. Bununla belə o Qırğızıstan hakimiyyət orqanları ilə danışıqların davam etdiyini deyib.
Ağ Evin mətbuat katibi Robert Qibbs isə bildirib ki, "Manas" bazası ABŞ üçün son dərəcə mühüm əhəmiyyət kəsb edir: "Birləşmiş Ştatlar vəziyyəti düzəltmək üçün Qırğızıstan hakimiyyəti ilə danışıqlar aparacaq".
Bu arada Vaşinqton Əfqanıstandakı ABŞ qoşunlarının təchizatına yardım edilməsi ilə bağlı Özbəkistanla saziş imzalamağa hazırlaşır. Hərbi mənbələr bildirib ki, bu addımın atılmasına səbəb Əfqanıstana hərbi yüklərin daşınması üçün istifadə olunan "Manas" hərbi bazasının bağlanması barədə rəsmi Bişkekin qərarıdır. Qərbdəki diplomatik dairələr artıq Özbəkistan hakimiyyət orqanlarının bu işdə Birləşmiş Ştatlara yardım göstərməyə razılıq verdiyini bildirirlər.