İRANA QARŞI SANKSİYALARIN GENİŞLƏNDİRİLMƏSİ MÜZAKİRƏ OLUNUB


5+1 qrupuna daxil ölkələrin (BMT Təhlükəsizlik Şurasının beş daimi üzvü - ABŞ, Rusiya, Çin, Böyük Britaniya, Fransa və Almaniya) xarici işlər nazirləri dekabrın 16-da Nyu-Yorkda İrana qonşu ərəb ölkələrindən olan həmkarlarıyla birgə toplantı keçiriblər. İclasda İranın nüvə proqramı barədə müzakirələr aparılıb və Tehranın bu istiqamətdə fəaliyyətindən narahatlıq vurğulanıb.

«Media forum» saytının məlumatına görə, Bəhreyn, Misir, Birləşmiş Ərəb Əmirlikləri, İordaniya, İraq, Səudiyyə Ərəbistanı və Küveytin xarici işlər nazirlərinin qatıldığı iclasda İranın nüvə sahəsindəki ambisiyaları pislənib, ölkənin nüvə fəaliyyətinin dayandırılması üçün BMT Təhlükəsizlik Şurası, Beynəlxalq Atom Enerjisi Agentliyi və 5+1 qrupunun göstərdiyi cəhdlərə dəstək verilib.

İclasdan sonra jurnalistlərə açıqlama verən ABŞ dövlət katibi Kondoliza Rays İrana qarşı sanksiyaların genişləndirilməsi barədə müzakirələr aparıldığını vurğulayıb.