Türkiyədə səfərdə olan ABŞ prezidenti Barak Obama Böyük Millət Məclisində çıxış edib.

APA-nın xəbərinə görə, B. Obama ABŞ prezidenti qismində ilk dəfədir bir ölkəyə rəsmi səfər etdiyini vurğulayaraq iki dövlət arasında dostluq və müttəfiqliyi möhkəmləndirmək istədiyini deyib:

“Türkiyə Amerikanın önəmli müttəfiqi, Avropanın önəmli bir parçasıdır. Mən bu səhər Türkiyə Respublikasının qurucusu olan Atatürkün məzarını ziyarət etdim və o mavzoleydən çox təsirləndim. Çünki Atatürk tarixi dəyişdirən liderdir. Amma daşdan və mərmərdən inşa edilmiş heç bir abidə onun mirası ola bilməz. Atatürkün ən böyük mirası Türkiyənin dünyəvi və canlı demokratiyasıdır. Bu günlərə asanlıqla gəlinməyib. Birinci Dünya Müharibəsinin sonunda Türkiyə asanlıqla təslim ola, yaxud imperiyanı davam etdirə bilərdi. Amma Türkiyə fərqli bir yol seçdi. Xaricilərin nəzarətindən çıxaraq respublika qurdu, Amerikada və Avropada hörmət qazandı. Demokratiya sizin öz uğurunuzdur və kənardan gətirilməyib. Türkiyə keçmişinin uğurlarından və yeni nəslin fəaliyyətindən güc alıb. Bir basketbol azarkeşi olaraq Amerikada oynayan Hidayət Türkoğlu və Mehmet Okurun uğurlarını da qeyd etmək istərdim”.

B. Obama ABŞ-da vaxtilə quldarlıq quruluşunun mövcud olduğunu xatırladaraq bildirib ki, hər ölkə öz keçmişi ilə barışmalıdır: “Tarix faciəvi gerçəklərlə doludur. Amma keçmişdəki məsələlər həll edilməsə, yük kimi daim çiyinlərimizdə qalacaq. 1915-ci ildə baş vermiş hadisələr mənim yox, ermənilərlə türklərin birgə həll edəcəyi məsələdir. Bu istiqamətdə atılan cəsur addımları görürük. Sərhədlərin açılması türk və erməni xalqlarının sülh, rifah içində yaşamasına gətirib çıxarar və hər iki ölkənin mənafeyinə uyğun olar. Qarabağda uzun müddətdir davam edən problemin həlli istiqamətində də addımlar atılmalıdır”.

B. Obama İranı nüvə silahı yaratmaq cəhdindən vaz keçməyə çağıraraq bu ölkənin seçim qarşısında olduğunu söyləyib: “İran seçim etməlidir: ya sülh və təhlükəsizlik, ya da silahlar”. Onun sözlərinə görə, heç bir ölkəyə qarşı terrora bəhanə tapmaq, haqq qazandırmaq mümkün deyil: “PKK-nı və digər terror təşkilatlarını dəstəkləmirik”. Müsəlman dünyası ilə əlaqələri genişləndirmək istədiklərini vurğulayan B. Obama bəyan edib ki, ABŞ islamla savaşda deyil, olmayıb və olmayacaq.

LENT.AZ