Qarabağ mövzusunda çəkilən “İtirilmiş həqiqət” bədii filminin təqdimatı keçirilib

Bakı. Kəmalə Quliyeva - APA. Bu gün Azərbaycan Kinematoqrafçılar İttifaqında Qarabağ mövzusunda çəkilən “İtirilmiş həqiqət” iki hissəli bədii filmin təqdimatı keçirilib. APA-nın məlumatına görə, gənclərdə vətənpərvərlik ruhunun yüksəlməsinə yönələn filmin yaradıcıları tanınmış idmançılardır. Filmin prodüseri, ssenari müəllifi və rejissoru Azərbaycan Qocyu-Ryu Okinava Karate-do və Kobudo Federasiyasının prezidenti Tarverdi Allahverdiyevdir. T. Allahverdiyev bildirib ki, filmin çəkilişləri Bakıda və İsmayıllı rayonunda aparılıb. Filmin birinci hissəsi 1 saat 20, ikinci hissəsi isə 1 saat 5 dəqiqədir.

Çəkilişlərə İdman və Gənclər, Mədəniyyət və Turizm, Müdafiə nazirlikləri yaxından dəstək verib.

Gənclər və idman nazirinin müavini İntiqam Babayev deyib ki, filmdə yalnız idmançılar iştirak edib: “Onlar indiyə kimi dəfələrlə Azərbaycandan kənarda ölkəmizi yüksək səviyyə də təbliğ edib, Azərbaycanın bayrağını yüksəklərə qaldırıblar”.