Türkiyə-Ermənistan sərhədindəki Əlican kəndinin sakinləri və yerli bələdiyyə sərhədin açılmasına qarşı çıxıb

İğdır – APA. Bu gün Türkiyənin “Doğan” xəbər agentliyinin əməkdaşları Ermənistanla sərhəddə yerləşən Əlican keçid-buraxılış məntəqəsindəki vəziyyəti öyrənmək üçün İğdır bölgəsinə gediblər.

APA-nın xəbərinə görə, jurnalistlər İğdır şəhər mərkəzindən 16 km şərqdə yerləşən Əlican keçid-buraxılış məntəqəsinin hərbi zona olduğunu və kənar şəxslərin ora buraxılmadığını yazıblar. Ərazini qoruyan türk hərbçiləri jurnalistlərin suallarını cavablandırmayıblar. Media mənsublarının həmin ərazidə gözləməsinə də icazə verilməyib. Məntəqənin yaxınlığındakı Əlican kəndinin sakinləri isə sərhədin açılmasına qarşı olduqlarını bildiriblər: “Biz azəri qardaşlarımızı bir kənara itələyərək sərhəd qapısının açılmasını istəmirik. Azəri qardaşlarımızın küsdürülməsinin əleyhinəyik. Azərbaycanın və Türkiyənin istəkləri yerinə yetirildikdən sonra sərhəd qapısı açıla bilər”.

İğdırın sərhədə yaxın Qaraqoyunlu qəsəbəsinin bələdiyyə sədri, hakim Ədalət və İnkişaf Partiyasından olan Ziyad Əli Dəlikdaş da yerli əhalinin böyük əksəriyyətinin sərhədin açılmasına qarşı olduğunu açıqlayıb: “Biz bir millət, iki dövlətik. Ermənilər zorla Qarabağı işğal edib. Azərbaycandan aldıqları torpaqları geri versinlər, soyqırım iddialarından vaz keçsinlər. Düzdür, sərhədin açılması iqtisadi baxımdan müəyyən gəlir gətirəcək. Ancaq bu, çox da önəmli deyil”.