DAHA 11 MƏHBUS AZADLIĞA BURAXILIB

Ümumilikdə 14 saylı cəzaçəkmə müəssisəsindən 150 məhbusun azadlığa çıxacağı gözlənilir


TURAL


Ədliyyə Nazirliyi Penitensiar Xidmətinin 14 saylı cəzaçəkmə müəssisəsində cəza çəkən 540 məhbusdan 150 nəfərinə Amnistiya Aktı şamil ediləcək. SİA-nın məlumatına görə, bu barədə 14 saylı cəzaçəkmə müəssisəsinin rəisi, ədliyyə polkovnik-leytenantı Ərşad Həsənov açıqlama verib.
Dünən sözügedən cəzaçəkmə müəssisəsindən 11 məhbusun azadlığa buraxılması ilə bağlı təşkil edilmiş mərasimdə çıxış edən rəisin sözlərinə görə, bu günədək həmin həbsxanadan 38 məhbus azadlığa buraxılıb. Azadlığa buraxılan məhbuslardan ikisinin xarici vətəndaş olduğunu deyən polkovnik-leytenant bildirib ki, Amnistiya Aktı şamil olunan məhbusların əksəriyyəti cəzalarının sonuna 6 aydan az qalanlardır.
Yeri gəlmişkən, azadlığa çıxan məhkumlar müxtəlif cinayətlərə görə həbs olunan insanlardır. Məsələn, mərasimdə çıxış edən azadlığa buraxılan məhbuslardan biri - İsrail Məmmədov narkotik satışı ilə bağlı məhbəsə düşdüyünü və əməlindən peşman olduğunu bildirib.