İranlı politoloq: “Türkiyə-Ermənistan sərhədlərinin açılmasının Qafqazda sülhə nə qədər xidmət edəcəyini söyləmək çətindir” -

Moskva. Roman Ağayev-APA. “Türkiyə ilə Ermənistan arasında sərhədlərin açılmasının Qafqazda sülh və sabitliyin möhkəmlənməsinə nə dərəcədə kömək edəcəyini söyləmək çətindir”. Bu eksklüziv açıqlamanı APA-nın Moskva müxbirinə iranlı politoloq, İran İslam Azadi Universitetinin professoru Şuayib Bəhmən verib. Moskvada keçirilən “Xəzər hövzəsində Rusiya-İran əməkdaşlığı: qarşılıqlı əməkdaşlığın regional və qlobal səviyyələri” beynəlxalq konfransında iştirak edən politoloq bildirib ki, İran Qafqazda sülhün bərqərar olmasında maraqlıdır. “Buna görə də Qafqaz xalqlarının öz sülhə və təhlükəsizliyini təmin eləmək üçün atdıqları addımlar ilk növbədə onların daxili işidir”. Sərhədlər məsələsinə gəldikdə isə iranlı politoloq qeyd edib ki, bu məsələdə təkcə Türkiyə və Ermənistanın deyil, Rusiyanın da nə düşündüyü və arzuladığı çox vacibdir. “Təəssüf edirəm ki, İran bu müzakirələrdən kənarda qalıb. Bu isə qeyd olunan məsələ ilə əlaqədar dəqiq cavab verməyə və mövqe müəyyənləşdirməyə çətinlik yaradır. İran Türkiyə ilə münasibətlərə böyük dəyər verir və səmimi olaraq regionda sülh və sabitliyin bərqərar olmasını istəyir”.