قارا آی، آغ اولدوز!

"بایراغین طرحینی بیر گئرافیک اکسپرتی چکمه لیدیر یوخ کی سیاسی لیدر!" عنوانیندا اولان مقاله نی (1) یازاندان سونرا دوستلاریمیزین بیری علیرضا بئی فرشی یکانلی آدیندا بیر جاواب یازمیشدی کی اونون جاوابیندا منده بیر جاواب یازمیشام کی منجه بو قارا آی اولدوزلو بایراغین پرابلئمین بلکه حل ائده بیلسین. من بو ایکی یازینی اولدوغو کیمی گتیرمک ایسته ییرم و سونوندا، توتابیلیدیگیمیز نتیجه نی یازاجاغام.



اونجه حورمتلی علیرضا بئی فرشی یکانلی نین یازیسینی گتیریرم:





حؤرمتلی آیدین تبریزلی و قروپ اویه لری،

هر واقتینیز خئیر اولسون،



دیققتینیزی آشاغیدا گلن یازیلارا ایسته ییرم:

- تنقیدین آغیر-یونگولو یوخدور! تنقید یارارلی و منطق اوزوندن اولمالیدیر. هئچ کیم منطقی و عاغلا سیغان و دوز-آغیللی تنقیددن اینجیمز.

- گاموحچولاردان باشقا هئچ کیم بایراق طرحین بیر سیاسی لیدر وئرر دوشونمور! البته کی ابوالفضل ائلچی بی، پروفئسور ذهتابی، علی تبریزلی، و ... میللی روحا ییه له نیبلر و اونلارین میللی ایستکلری بیزیم میللی ایسته ییمیزدیر. بو اؤندرلر هر مسئله یه اطرافلی و گئنیش باخیشلاری اولدوقلارینا گؤره و بیلگی یییه سی اولدوغونا گؤره صلاحیتلری سندن، و مندن بایراق مسئله سینده چوخدور و بیز اونلارین دیکتاتور باخیشین یوخ، بلکه نظرلریندن فایدالانیریق. بو اؤندرلرین هئچ بیری ده دیکتاتور باخیشلی بیر اینسان دئیللر و میللتچی اولدوقلارینا گؤره میللت سون سؤزو دئیه جک اینانیرلار.

- بیز "گونئی آذربایجان" اوچون بایراق یاراتماق ایسته میرک و بو صلاحییتیمزده یوخدور! بیز "آذربایجان میللی حرکتی­نین" چالیشقانلاری اولدوغوموزا گؤره حاققیمیز وار "گونئی آذربایجان میللی حرکتی" اوچون بیر سیمبول یارالاداق و بو سمبولو بایراق ائدیب میللی حرکتی دونیایا بیر سمبول ایله تانیتدیراق و او سمبولو اؤز چالیشمالاریمیزین گؤسترچی سی و منیمسه یه نی کیمی تانییاق و او بایراغین آلتیندا سینه ووراق! بیر داها خاطیرلاماق ایسته ییرم، لوطفن دیققت ائدن! بیز گونئی آذربایجان اوچون کئچیچی یا سون اولاراق بایراق یاراتماق ایسته میریک! بیز "میللی حرکتیمیز" اوچون بیر سیمگه یاراتماق ایسته ییرک و بو سیمگه نی آذربایجانین میللی مجلیسی اولان زامانا دک، و میللی حرکتین بو شکیلده داوام ائدن زامانا دک قالدیریب اسدیرمک ایسته ییرک و ایسارتدن آزادلیغا گئدن کؤرپونون سیمبولو ائتمک ایسته ییرک! گونئی آذربایجان بایراغینی میللی مجلیس اویه لری اؤنریلره دیققت ائدندن سونرا سس آلیب سس وئره بیلر! بیزیم یالنیز "گونئی آذربایجان میللی حرکتی" اوچون بیر سیمبول و بایراق سئچمک مشروعیتیمیز وار، و بو سئچکمده میللی اؤندرلریمیزین نظرلری، و آغ ساققاللارین سسی بیزه چوخ ده یرلی دیر.

- بایراغی میللت اوتوروب، بیر قیرافیست اؤتورب کاغاد اوسته چیزماز! بایراق ساواش مئیدانیندا یارانار، اونون آیاغیندا قان وئریلر، جان وئریلر، هزینه وئریلر، آغلانان، گولونر، توی اولار، یاس اولار، و ... و میللتین اوره یینه تاخیلار. آذربایجانین ایکی تاییندان محمد امین رسولزاده نین بایراغینا بئله یاناشیبلار! گونئیلی و قوزئیلیلر بیرلیکده قوزئیین باغیمسیزلیغیندا چالیشیب و بو یولدا جانلاریندان و ماللاریندان مایا قویوبلار. قوزئی ده اسن بایراق "بیر کره یوکسلن بایراق، بیر داها یئنمز" بایراقدیر. آما، قوزئی بایراغی "گونئی آذربایجان میللی حرکتی"نی تمثیل ائتمیر، و یالنیز آذربایجان باغیمسیزلیغین تمثیل ائده بیلیر. بونا گؤره بللی کی شوبهه نیز یوخدور.

- "گونئی آذربایجان میللی حرکتی"نین سیمگه سی ائله بیر بایراق اولمالیدیر کی بیزیم ایستکلریمیزی و ان زیروه ده دوران ایسته ییمیزی کی «میللتلشمه، بیرلشمک-بوتوولشمک» دیر اؤزونده گؤستره. قوزئی ده اسن بایراق بیزیم دولتلشمه میللی سیمگه میزدیر، آما بیزه میللتلشمه و بوتوولشمک سیمگه سی کی میللی حرکت بونون اوچون یارانیب لازیمدیر. میللتلشمه ده دونیادان قوزئیلیلرله برابر بیر تورک میللتی نی کیمی تانینماق ایسته ییرک، و ایکی یئره بؤلونموش بو میللتی دونیایا آچیقلاماق ایسته ییریک. بیز تورکوز! بیز آذربایجانلی­ییق! بیز بؤلونموش میللتیک! بو اوچ سؤزو بللی ائتمک اوچون ائله بیر سیمگه لازیمدیر کی فارس شووینیسمین «ایسارت»ین ده اولدوغوموزو، آیریلیقدان «یاس»دا اولدوغوموزو، و بوتولشمک و دولتلشمک سیمگه سی اولان «اوچ بویالی آغ آی-اودوزلو بایراغی» سئودیغیمیزی گؤسترسین. بو بایراق یالنیز «قارا آی-اولدوزلو» بایراق اولا بیلر. البته بو میللی حرکتین ایسته ییدیر و اولا بیلر کی میللی مجلیسیمیز قورولاندان سونرا، باشقا بیر فیکیر ده اولسون، آنجاق بیز هر زامان بو ایسته ییمیزی سسلندیره جه ییک و میللی مجلیسیمیز اولسا دا و بو ایدعایا قارشی چیخسا میللی حرکت دوام ائده جک و بو ایکی یئره بؤلونموش میللتی ایجازه وئرمه یه جک کی دونیادا ایکی آیری میللت کیمی تانینسین. آذربایجانلی تورکلر، ایکی یئره بؤلونموش تورک میللتیندن دیلر: آذربایجان تابعیتلی و ایران تابعیتلی میللت!

- لیدر، اؤندر، رهبر، و ... سئچگی ایله اولماز! آتاتورک، محمد امین رسولزاده، شیخ محمد خیابانی، ستارخان، حئیدر عموغلو، محمد تقی خان پسیان، ابوالفضل ائلچی بی، تبریزلی علی، نئلسون ماندئللا، قاندی، مایو، خمینی، و ... بونلار هانکی سئچگی ایله اؤندر اولدلار. بونلار چالیشیب، میللی ایستکلری هارایلاییب، اورکلره یئرله شیب و اؤلن چاغلارینا دک میللتین اؤندری و یول گؤسترینین کیمی قالدیلار. او جمهور باشقانیدیر کی بیر نئچه ایللیک اوچون سئچیلر!

- هر کیم لیدر اولا بیلر و بو لیدرلیک اونون صداقتیندن، میللتین یولوندا جانیندان، مالیندان، واقتیندان هزینه وئرمه ییندن آسیلیدیر. بوش-بوشونا اوتوروب من لیدئرم دئمک اولماز. بو میللتین دردیندن گئج-گوندوز یانان، یوخوسوندان، ایلنجه سیندن، و ... کئچیب بو میللته اؤز صیداقتین بللی ائدندن سونرا لیدر اولا بیلر! او زامان لیدئر اولار کی مینلرجه اینسان اونون سؤزونه باخسین، اونون اولو روحونا باش ایسین! البته اولا بیلر کی لیدیر یانلیش ایش ده گؤرسون! آما اؤز یانلیش ایشلرینه میللته دئییب، میللت دن «منی باغیشلایین» ایسته مه لیدیر. میلله ته باش ایمه ین لیدئر، لیدئر اولا بیلمز!

- بیر داها لازیم اولور کی دئیم: بیز نه «گونئی آذربایجانا» و نه «آذربایجان تورک میلله تی»نه بایراق سئچمک ایسته میریک! بیز یالنیز و یالنیز «گونئی آذربایجان میللی حرکتی» اوچون کی یالنیز و یالنیز چالیشقان میللتچیلرین اونو سئچمه یه مشروعیتی وار بیر سیمبول سئچمک ایسته ییرک. بو میلله تین بیر بایراغی وار و او بایراق دا محمد امین رسولزاده و فتحعلی خان خویی نین بایراغیدیر! تبریزده ایکی بایراق هر بایراق دان چوخ اسیر: ایران بایراغی و تراکتورسازی بایراغی! تراکتورسازی بایراغی داها چوخ سئویلیر و ائولرده، داملاردا، پنجره لرده، و فوتبال مئیدانلاریندا اسیر! آنجاق بیز ایسته ییرک میللی حرکت سیمگه سی اونون یئرین دولدورسون و هر ائوده کی میللتچی وار، آذربایجان میللی حرکت بایراغی اوردا اولسون!

- بایراغین شکلی و طرحیندن چوخ اونون معنوی داشیدیغی رولدور. طرح چوخ اؤنملی اولسا پیکاسونون، داوینچی نین طرحلریندن بیرینی بایراق اوستونه گتیرردیک! آنجاق، معنوی ده یرلرله بایراغی آغیر-یونگول ائدرلر. قوزئی ده اسن بایراق آذربایجان تورکلرینه ان زنگین و مقددس بیر بایراقدیر! موقددس بونا گؤره کی او باشدا دورار کن توپراغا قانلار تؤکولوب و مقددسلیغین توپراغا تؤکولن قانلاردان آلیب و بیزیم وارلیغیمیزین اون اولو سیمگه سیدیر. او وارکن، بیز واریق و بیز وارکن او اولاجاق! او بایراق تورپاق قوخوسو وئریر: آذربایجان تورپاقلاری! گونئی آذربایجان میللی حرکتی ده ایسته ییر کی اونون معنوی ده یرین منیمسه سین، و ائله اونا گؤره او بایراغی چوخ اوخشاسین دئیه «قارا آی-اولدوزلو» بایراغی بیر سیمگه کیمی سئچمک ایسته ییر و او بایراقدان چوخ فرقلی اولماغا ایجازه وئرمه ییر. بیلمیرم دوشونه بیلیرسینیز یوخسا یوخ! هئچ بیر یئنی بیر طرحده قوزئی ده اسن بایراغین قوتساللیغی یوخدور و یالنیز بیر آدامین خودکار، میداد، قلم، ماژیک، و الکترونجیک هزینه سی ایله یارانیب! سیزجه یئنی بیر طرحه قوتساللیق نئجه وئرمک اولار! ائله بونا گؤره یالنیز بایراقدا بیر آزجاجیق ده ییشیک وئریب، او قوتسال بایراغین تقددوسون اؤز میللی حرکتیمیزین بایراغیمیزا داشیمالییق. بو بیر ایدعادیر و حتی گونئی آذربایجان میللی مجلیسی ده بونا قارشی چیخسا اونون قاباغیندا بیر باشقا میللی حرکت سوروله جکدیر و بو ایدعا یئرینی آلانا قدر جانیمیزی، مالیمیزی، آبیریمیزی، و ... اوتایا قویاجاییق.

- بیر داها لازیمدیر دئیم کی بو «قارا آی-اولدوزلو» بایراق، باغیمسیزلیق، فئدرالیق، و ... بایراغی دئییل! یالنیز و یالنیز «گونئی آذربایجان میللی حرکت» بایراق سیمگه سیدیر. گونئی آذربایجان بایراغینا دا بو «میللی حرکت سیمگه­سینده» ده یرلی فیکرلر آپاریلیب. باغیمسیز اولان زامان دؤلتلشمه نیشانی اولن اولدوز آغاراجاق، آما آراز ایکی تای آراسیندا بیر سنیر کیمی قالان زامانا دک آی آرازین و آیریلیق نیشانه سی اولان کیمی قارا قالاجاق. البته بو یالنیز بیر فیکیردیر و میللی مجلیس بونا قارشی چیخار، و بیزده اولا بیلر کی میللی مجلیسه قارشی چیخاق! آنجاق، میللی مجلیس سون اولاراق هانکی قراری وئرسه بللی کی بو بیر ایدعا کیمی بیزیم بئینیمیزده قالاجاق و میللی میجلیسین قرارینا باش ایمک مجبوریتینده قالاجاییق! آما بو ایدعادان هئچ زامان ال چکمه ییب و زامانی گلدیکده بیر داها و بیر داها مطرح ائده جه ییک و بو آذربایجانین ایکی تاییی بیرلشن زامانا دک دوام ائده جک. ایکی آذربایجان بیرلشن زامان «قوزئی ده اسن بایراق» آذربایجان دا یاشایانلارین سیمگه سی اولاجاق! بو سؤزلره هر کیم قارشی دورسا بیر میلله ته خییانت ائدیر و بیز بو ایدعایا قارشی دورانلارین قارشیسیندا دوراحجییق. هر کیم بو میللتی ایکی باشقا میللت و بیر-بیریندن آیری بیر میللت حئساب ائدیر، هر کیم بو ایکی یئره بؤلونموش میللتین آیریلیغینا دوام وئرمک ایسته ییر، هر کیم بو میللتین قوزئی ده اسن بایراغینا توهین ائدیر، بللی کی ساتقین و یا جاهیلدیر! بو میللت فیزیکن آیریلسادا، روحن هئچ زامان آیریلماییب! آرازین ایکی تاییندان هر زامان حسرتله باخمیشیق بیر-بیریمیزه! اولا بیلر کی بیر همدانلی، قزوینلی، بیجارلی، و ... بئله دوشونه بیلمه سین و اؤزونو لورا، کورده، فارسا، و ... یاخین گؤرسون! آما بیز مرندلیلره آراز گؤزلریمیزده بیر باتمان یاشدیر! آراز ایکی تایین آغلار گؤزلریندن آخان یاشدیر! بیر آز لوطفن بو میللتی دوشونوب دانیشین، یازین، و ..! بو میلله ته آغالیق، خانلیق یوخ! بو میلله تین ایستکلرینه چوبانلیغی، بانلیغی اؤیرنین، و بو قوروجولوغوزا گووه نین!

- خییابانی و پیشه وری، و ... اؤز زامانلاریندا یاشاییردیلار و البته کی ایران آزادلیغینا چالیشیردیلار! بیز داها ایرانا یوخ، بلکه یالنیز و یالنیز آذربایجانا چالیشیریق. آذربایجانین آزادلیغی تئهراندان یوخ، بلکه تبریزدن کئچیر: تبریزین ساعات قاباغیندان، راستا کوچه سینن-بازار قاباغیندان، آبرئساندان، و ..! خییابانی و پیشه وری و ... دوشونجه سی آنجاق آزادلیق اوچون و تورک دیلینده اؤیرتیم و ایداره اوچون بیزه یارارلیدیر! اونلارین دوشونجه سی بیزی بیرلشدیره بیلمز، بیزی بوتوولشدیره بیلمز، بیزه بایراق وئره بیلمز، بیزی میللتلشدیره بیلمز! بیزه ائلچی بی لر، پروفئسوز زهتابی لر، تبریزلی علی لر، اسماعیل قاسپیرالیلار، و ... لازیمدیر.

- قارا رنگ دونیانین ان اوستون و ایلاهی رنگیدیر و مجهوللار رنگی دیر! یاس پالتارلاریدا مجهوللار دونیاسینا پای گئدن اؤلو اوچون ایینلره گئیینیر و البته کئچیجی بیر گئییمدی! آرادان گئتمیشین عائله سینه سایغی گؤسترمک بیر بویادیر. بیزیم ده آزادلیغیمیز آرادان گئدیب، و آزادلیغا و قوزئیه سایغی گؤسترمک نیشانه سی اولان بو بویانی سئچمیشیک! سیز دونیانین هانکی اؤیرتیم سیستئمینه دایاناراق بو طرحین ایشکاللی اولوغوندان صحبت آچیرسینیز. هانکی متدلا بو مسئله یه یاناشیرسینیز! آوروپا قیرافیکا سیستئمی و بویا ده یرلریندن دانیشماق ایسته ییرسینز! لوطفن اؤز میللتیمیزه مراجعه ائدین و گؤرون قارا بویانین بیزده نه ده یری وار! آورپالی لار قوردو دا پیس بیر حئیوان گؤرورلر! سیزجه بیز بؤزقوردو دا سیمگه اولاراق تورکلوک نیشانه سی کیمی قالدیرمایاق؟

- فارسلار ایندی ده بیزیم دیلیمیزی، کیملیگیمیزی، و ... مسخره یه قویوب، جوک دوزلدیب، گولورلر! سیزجه اونلارین ائتدیغی فاشیستی ایشلره گؤره بیز اؤزوموزو داناق، میللیتیمیزی داناق، بایراغیمیزی داناق و ..! بو نو گولونج سؤزلردیر کی دئییلر! فارسلارین چالدیغینا بیز اوینایاجاییق می؟ ائی واه!

- بیزیم اوغور گونوموز بیرلشمه دن سونرادیر! بیرلشمه یه­نجه بیزه اوغوز گون یوخدور! بو میللت ایکی بؤلونموش حالدا اولدوغو گونه کیمی، ایکی یئره بؤلونموش ووجود و وارلیق کیمی یاشایا بیلمز! شاخمار اکبررزاده دئدیغی کیمی و_ بیر یاندا _طن بیر یاندا اولانا کیمی، وطن یارانماز! بیز وطن سیز بیر میللتیک! و_ بیر یاندا، _طن بیر یاندا قالان، بیر سؤزجوک ایکی سطرده، بیری آراز سطرین اوستونده و بیریسی ده آشاغیدا بؤلونوب. ائله اونا گؤره ده او گونه قدر بیزیم بایراغیمیز یاسدا اولاجاق! بیر داها خاطیرلاییرام کی بو بیر ایدعادیر و اولا بیلر کی میللی مجلیسیمیز بونا قارشی چیخسین! اوغور گونوموزون بایراغی بو ایدعادا قوزئی ده اسن بایراقدیر و بیز بو میللته ایکی بایراق یاراتمایاجاییق! قوزئی ده اولان بایراق گونئی لیلرین صاندیقلاریندادیر و گونده اؤپوپ، اونا ساریلیب، اونون اوزینه آغلاییب، گؤز یاشلارین اونلا سیلیرلر!

- بیر ساواشدا مغلوب اولانین بایراغی اوستونده هئچ بیر طرح اولمایان آغ پارچادیر! هاچاندان قارا پارچا مغلوبیت نیشانه سی اولوب! شیعه لرین نظرینه گؤره، ایمام زمانا یاردیم ائدنلرین بایراغی قارا بویالی بیر بایراق اولاجاق! من شیعه لیکدن مدافعه ائتمک ایسته میرم، آما قار رنگی بوردا شیعه لر اوچون عصیان بایراغی کیمی تقدیم اولور و ایستر-ایستمز بیزیم میللت شامانیسمه دایانان شیعه دیر! قار رنگ شامانیسمده ان اوستون بویادیر! هر زادا اوستونلوک و تقدس وئرمک ایسته سه لر اونو قارا بویا ایله بویایارلار. قارا توپراق، قارا آغاج، قارا قوش، قارا آت، قارا قورد، قارا پیشیک، قارا قوچ، قارا خوروز، قارا پالتار، قارا دئو، قارا قازان، قارا باش، قارا گؤز، قارا قاش، و ... چوخلو قارالار اوستونلوک بویاسیدیر. تورک کولتوروندن قارا بویاسی مغلوبیت، قار دریلیک، و ... آنلامدا دئییل! آغیرلیق، اوستونلوک، ایشیغا گئتمک نیشانه سیدیر. قارالیقدان آغلیغا گئدن یول بیزیم یولوموزدور! ایسارت دن آزادلیغا گئدن یول بیزیم یولوموزدور.

- سیزجه آغ بایراق و مغلوبیت سیمگه سی اولان ساواشدان قاچماق باریشا اوز گتیرمک بایراغیندان فایدالانماق سوچدور! ائله زامان گلر کی مجبوراً آغ بایراق قالدیرمالی اولاریق و سییاست ده بو بیر گئرچکدیر. گورجوستان کیمی گوجوموز اولمایا-اولمایا روسلارا قارا بایراق قالدیریب، ساواشمامالییق! واقتی گلرسه آغ بایراق، لازیم اولورسادا قارا ساواش و عصیان بایراغین قالدیرمالییق. نئجه کی بیر زامان چنگیر خان قارا بویانی ساواش علامتی اولاراق فایدالانمیشدیر، ایندی وقتی گلدیکجه بیزده ساواش علامتی اولان قارا آی-اولدوزوموزو قالدیراجاییق.

- یازدیغینیز مقاله نین قاییپدان باشلانان یئردن اوخومادیم و گرکسیز گؤردوم. بیز قوزئی بایراغیندان باشقا هئچ بایراغی قبول ائتمییه جه ییک، و «گونئی آذربایجان میللی حرکتی»نه یاراشان بایراق، قوزئی ده اسن «آذربایجان بایراغی»نا اوخشادیغین اونایلاییریق، و بو بایراق کئچیجی بیر بایراق اولسون دئیه، قارا بویادان باشقا هئچ بویا آی-اولدوزا یاراشان دئییل. ساری، ماوی، و ... باشقا بویالار کئچیچی بایراغین آنلامین آرادان آپاریر! آما قار بویا یاس و آیریلیق سیمگه سی اولاراق کئچیجی بیر بویادیر.



لوطفن یئنی-یئنی اؤنریلرین طرح اولونماغینا ال آتمایین، و بو اؤنریلمیش «مختصر آذربایجان تاریخی»نین کیتابینین دؤره سینده توپلانیب، میللی حرکتی گوجلندیرمه یه چالیشین و آرتیق چاش-باشلیغا ایذین وئرمه یین.



سایغیلارلا







منیم جاوابیم:



حورمتلی علیرضا بئی،





سیزین سوزلرینیز بیر بیری ایله متناقض دیر. اول دئییرسینیز: " بیز گونئی آذربایجان اوچون کئچیچی یا سون اولاراق بایراق یاراتماق ایسته میریک! بیز "میللی حرکتیمیز" اوچون بیر سیمگه یاراتماق ایسته ییرک و بو سیمگه نی آذربایجانین میللی مجلیسی اولان زامانا دک، و میللی حرکتین بو شکیلده داوام ائدن زامانا دک قالدیریب اسدیرمک ایسته ییرک و ایسارتدن آزادلیغا گئدن کؤرپونون سیمبولو ائتمک ایسته ییرک!"



و سونرا دئییرسینیز: " باغیمسیز اولان زامان دؤلتلشمه نیشانی اولن اولدوز آغاراجاق، آما آراز ایکی تای آراسیندا بیر سنیر کیمی قالان زامانا دک آی آرازین و آیریلیق نیشانه سی اولان کیمی قارا قالاجاق. البته بو یالنیز بیر فیکیردیر و میللی مجلیس بونا قارشی چیخار، و بیزده اولا بیلر کی میللی مجلیسه قارشی چیخاق!"



گلین کیشی کیمی سیمگه سوزو ایله حقیقتی دانمایین! سیز گونئی آذربایجانا دولت بایراغینی قارا آی و آغ اولدوز اونری وئریرسینیز و حتی تهدید ائدیرسینیز کی " میللی مجلیس بونا قارشی چیخار، و بیزده اولا بیلر کی میللی مجلیسه قارشی چیخاق!"



بو همان پرابلئمدیر کی من اوندان چوخ قورخورام. یعنی بایراق تارتیشماسی او قدر ناموس قضیه سینه چئوریله کی گونئیده بیر دولت قورولماسینا انگل اولا و هرکس اوز دئدیگی بایراق سئچیلمه سه یئنی قورولان و چوخلو باشقا پرابلئملری اولان دولته قارشی چیخا! یعنی بو یئنی قورولان دولت ساده جه شوونیستلرله یوخ بلکه فاناتیک بایراق سئور میللتچی لرله ده قارشی قارشی یا دورمالیدیر! بو بیزی دوشمن قاباغیندا تضعیف ائدیب و بلکی یئنی قورولان دولت، شوونیست لر طرفیندن یوخ، فاناتیک بایراقچی لار طرفیندن ییخیلا! سیز نئجه تهدید ائدیرسینیز کی میللی مجلیسه قارشی چیخاجاقسینیز!؟ او بحرانلی دورومدا میللی مجلیسین و دولتین الیندن توتماق یئرینه آیاغیندان ووراجاقسینیز بلکه!؟ نئجه بیر رنگ بیزی قوزئی دن آییرا بیلر؟! دویغوساللیغی قیراغا قویماق لازیمدیر. ایکی آلمانین بایراقلاری او قدر فرقلی ایدی ندن بیرلشدیلر. ایکی آذربایجانین بیرلشمه سینه انگل اولان بیر بایراق یا رنگ دئییل، بلکی بیزیم دولتیمیز اولماماق دیر و اگر بوجور کی سیز تهدید ائدیرسینیز اولورسا، او دولتین آیاغینداندا ائله سیز ووراجاقسینیز و ییخاجاقسینیز!



همین بو خطرلر گوستریر کی بیز گرک ایندیدن بیر دولت بایراغی اوستونده توافقا چاتاق، یوخسا بو کیچیک مساله بیزه بویوک ضرر ووراجاقدیر و بیزیم دولت قورماغیمیزا انگل اولاجاقدیر. اوندا اولابیلر کی بیز شوونیستلرین قارشی سیندا دورماق یئرینه رنگلر اوستونده بیر بیرمیز ایله ساوشاجاییق! گلین بو ساواشی ایندی بیر سونوجا چاتدیراق و سیمگه دئمک ایله بو سورو دان قاچمایاق کی گونئی آذربایجانین دولت بایراغی نه اولمالی دیر؟ بو پرابلئمی او بحرانلی زامانلارا ساخلامایاغین. اگر آند ایچیب سینیز کی قارا اولسون، پس سیزین اونری نیز قارا آی قارا اولدوز دئییل بلکه، قارا آی و آغ اولدوزدور! پس ان آزی کیشی کیمین اونری نی دوز اورتایا قویون و اولدوزو ایندی دن آغارتین! اوندا ان آزی اسارتده اولماق آنلامی بایراقدا اولماز و اسارتی قبول ائتمک معناسینی داشیماز. اوندا بلکی بو اونری نین ده اشکاللاری آزالار و قارا آی و آغ اولدوزو قارانلیقدان ایشیقلیغا کئچمک نیشانه سی کیمی اورتایا قویا بیلریک. یعنی بیز نه اسارتی قبول ائدیریک و نه ایکیه بولونمه نی. پس قارا آیی ایکیه بولونمه نیشانه سی یوخ، قارانلیق گونلردن، ایشیق و آزادلیق گونلرینه کئچمک سیمبولو کیمی بایراقدا قویا بیلریک.



من اصلا دویغوسال مساله یه باخمیرام و سیزین تفسیرینیزین ایشکاللی اولدوغونو وورغولاییرام. بیز هر نیشانه نی بایراغا قویساق اونو قبول ائتمیش اولوروق. یعنی بیزیم بایراغیمیزدا اسارت نیشانه سی اولورسا، و بیز او بایراغی دالغالاندیرساق، اسارتیمیزی قبول ائتمک آنلامیندادیر یوخسا ندن دالغالاندیریق؟! و اگر ایکیه بولونمک آنلامی اولورسا یئنه اونو قبول ائتمک آنلامیندادیر. بیز اوز بایراغیمیزلا شاواشا بیلمریک. بیز اسارتده اولماغی گوسترن بایراغی قالدیرمامالییق. پس قارا آی، آغ اولدوزو بوجور تفسیر ائتمه لییک کی بیزیم آماجیمیز قارا گونلردن، ایشیق گونلره کئچمک دیر. قارا آی، کئچمیشده کی و بو گونده کی قارا گونلریمزی گوستریر و آغ اولدوز گله جکده ایشیق گونلریمزی عکس ائتدیریر. مثلا دئیه بیلریک کی آیین قارا رنگی بو معنادادیر کی آی توتولوب (خسوف اولوب) اوندا طبیعته ده صادیق قالا بیلریک و طبیعتده اولمایان قارا اولدوز، کی قارا دری لی لرین نیشانه سی دیر ده بایراغیمیزدا اولماز. بوجور اولورسا منده دئیرم قارا آی و آغ اولدوزون اشکالی یوخدور.



بیر مساله یه دیققت ائتمه لییک کی بیز قارا رنگی یاس توتماق معناسیندا ایشلتمه مه لییک. بیزیم کولتوروموزده بیر عزیزیمیز دونیاسین دئییشندن سونرا و الدن گئدندن سونرا، اونا یاس توتوب و قارا گئییریک. بیز اسارتده اولدوغوموز اوچون یاسلی اولماغی قبول ائتسک، آزادلیغین الدن گئتمه سی و بیرداها اله گله بیلمه مه سی نیشانه سی اولا بیلر. نئجه کی بیر عزیزیمیز دونیاسین دئیشندن سونرا اونون بو دونیادا گورمه سیندن داها اوموت کسیریک. یاس توتماق، اومودوموزو کسمک آنلامینا گلیر و اصلا یاخشی بیر معناسی یوخدور. هابئله بیز ایکیه بولوندوغوموز اوچون ده یاس توتمامالییق. بو بیرلیکدن اومودوموزون کسیلمه سی آنلامینا گلر.



آما اگر همان قارا آی و آغ اولدوزو، قارانلیقدان ایشیغا گئدن یولوموز کیمی تفسیر ائتسک، قبول اولونا بیلر. قارا آیی طبیعتده اولان آی توتولماسی دا معنا ائده بیلریک. بو کی دئیه ک قارا رنگ، بیرلشمکدن سونرا آغاراجاق، او رنگین تفسیری دئییل. مگر ساری یا گوی رنگلری آغارمایاجاقلار؟! بیز قارا رنگه بیر موستقیل تفسیرده اورتایا قویمالییق کی بیریسی یاس علامتی دیر کی بیزیم کولتورموز ایله اومودو کسمک آنلامینا گلیر و بیریسی ده قارانلیقدان ایشیقلیغا گئدن یول و آماج علامتی اولا بیلر کی اومود وئریجی دیر و حتی آیین توتولماسی نین دا کئچیجی اولماسی (طبیعتده اولدوغو کیمی) گوزل بیر آنلامی واردیر. پس منجه بو تفسیر ایله قاباقداکی یازدیغیم اونریلرین یانیندا بو اونری ده یعنی «قارا آی و آغ اولدوز» دا اشکال سیز بیر طرح اولا بیلر. سوز بوردادیر کی بیز گرک دوزگون بیر تفسیر ایله بایراغیمیزی اورتایا قویاق. بو شکیلده بو سوز کی قارا اولدوزو سونرا آغارتاجاییق دا اورتادان چیخار نئیه کی بیز اوغور گونوموزده و دولتیمیزی قوردوغوموز گونده قالدیردیرماق ایسته دیگیمیز بایراغی ایندیدن دالغالاندیرمالییق. چون بایراق همیشه اوغور گونو اوچون حاضیرلانمالیدیر یوخ کی اسارت گونو اوچون.







(1): http://www.oyrenci. com/Articles. aspx?articleId= 917