İranda radikallar mövqelərini sərtləşdirirlər

İranda radikallar mövqelərini sərtləşdirirlər


İranda prezident seçkiləri ilə bağlı olaraq bir yandan namizədlərin dəqiqləşməsi prosesi gedərkən, digər yandan seçkilərin hər zamankı kimi özünəməxsus məhdudiyyətlərə səhnə olacağının işarələri ortaya çıxır. Məhdudiyyətlərin ilk nümunələrindən biri İranın keçmiş prezidenti Məhəmməd Xatəminin önümüzdəki prezident seçkisində namizədliyini dəstəkləyən “www.yaari.ir” və “www.yaarinews.com” saytlarına İrandan daxilolmanın məhdudlaşdırılması olub. Xatırladaq ki, Xatəmi prezidentliyə namizədliyini 2009-cu il Fevralın 8-də açıqlasa da, bu iki sayt əvvəlcədən Xatəminin namizədliyini irəli sürəcəyi düşüncəsi ilə hələ keçən yay aylarında açılıb. “Yaari” saytı Xatəminin tərəfdarları tərəfindən ünvanlanan müraciətləri, “Yaarinews” isə Xatəminin seçki kampaniyasını əks etdirir. Saytlara məhdudiyyətlər 21 Ferval tarixindən etibaərn tətbiq edilməyə başlayıb. İranda prezident seçkiləri isə 2009-cu il İyunun 12-də keçiriləcək.



İran rəsmiləri saytların bağlanmasına səbəb kimi, onların qanunsuz fəaliyyətini göstərirlər. İRNA agentliyi internet saytlarına nəzarət edən orqanın məlumatına əsasən bildirib ki, bu saytlar “milli birliyi xələl gətirdiyinə, ölkə əhalisində ümidsizlik yaratdığına, iftira və böhtan xarakterli məqalələr dərc etdiyinə” görə məhdudlaşdırılıb”. Bu iki saytın Xatəminin seçki qərargahlarının müdirlərini təqdim etmə mərasimi günündə bağlanması diqqət çəkib. Xatəmi tərəfdarlarının saytların bağlanmasına reaksiyası hələ ki orta sərtlikdədir. Saytlardan birinin redaktoru olan Bəhruz Şojaei qeyd etmişdir ki, “saytlarımızın bağlanması göstərir ki, radikallar Xatəminin Əhmədinejada meydan oxumasına fürsət vermək istəmirlər”. Xatəminin liderlik etdiyi islahatçılarından olan millətvəkili Daryuş Qənbəri isə jurnalistlərə açıqlamasında bildirib ki, internet səhifələrinə qoyulan məhdudiyyət əslində Xatəminin fəaliyyətlərini məhdudlaşdırmaq istəyindən irəli gəlir.

Qeyd edək ki, bu, namizədliyini açıqladıqdan sonra Xatəmiyə qarşı atılan ilk addım deyil. Fevralın 12-də, İranda inqilabın 30-cu ildönümü münasibətiylə keçirilən tədbirlərdə iştirak edərkən bir qrup əli dəyənəkli adam Xatəmiyə hücum etməyə çalışmışdı. Hadisə Tehrandakı Azadi Meydanında baş vermişdi. Əli dəyənəkli qrup “Xatəmiyə ölüm”, “Amerikan oyuncağı hökumət istəmirik” deyərək keçmiş prezident Xatəmiyə hücum etmiş, ancaq əvvəlcə Xatəinin tərəfdarları, sonra isə rəsmi mühafizəçiləri bu qrupun qarşısını alaraq Xatəmini hadisə yerindən uzaqlaşdırmışdı. Ancaq Xatəmi bu hadisədən sonra daha da fəallaşmış, Fevralın 13-də verdiyi açıqlamada bütün reformçuları “zəfərə doğru gedən yolda əmin addımlarla irəliləməyə və maneələrdən çəkinməməyə çağırmışdı”. Bu sözlərinin üstündən çox keçmədən kiçik də olsa növbəti maneə ortaya çıxdı. Görünür, Əhmədinejad hakimiyyəti xalq nəzdində azalan etibarının fərqindədir ki, hakimiyyəti qanuni imkanlarla olmasa belə rəqiblərinin imkanlarını məhdudlaşdırmaq bahasına saxlamağa çalışır.araztm