İrandan Azərbaycana qaçaqmalçılıq yolu ilə gətirilən külli miqdarda siqaret aşkar edilib

İrandan Azərbaycana qaçaqmalçılıq yolu ilə gətirilən külli miqdarda siqaret aşkar edilib

Yardımlı rayon Polis İdarəsinin əməkdaşları üzərində aksiz markası olmayan 7 mindən artıq siqaret müsadirə edib

İran İslam Respublikasından Azərbaycana qaçaqmalçılıq yolu ilə siqaret məhsulları keçirilməsinin qarşısı alınıb. ANS PRESS-in bölgə müxbirinin məlumatına görə, Yardımlı rayon Polis İdarəsinin əməkdaşları rayonda əməliyyat axtarış tədbirləri keçiriblər. Nəticədə rayonun Aruz kənd sakini 1980-ci il təvəllüdlü Mirzə Füzuli oğlu Cabirin idarə etdiyi «VAZ 2107» markalı 10 NO 755 dövlət nömrə nişanlı avtomobilin yük yerindən hər birində 50 blok olan 5 qutu xaricdə istehsal edilmiş, üzərində aksiz markası olmayan siqaret aşkar edilərək götürülüb.
1966-cı il təvəllüdlü Yardımlı şəhər sakini Tahir Hüseynağa oğlu Tahirovun idarə etdiyi «Mercedes Benz 200» markalı 90 EH 760 dövlət nömrə nişanlı avtomobildən isə ümumi sayı 5 min olan 10 qutu Cənubi Koreyada istehsal olunan və aksiz markası olmayan siqaretlər aşkarlanıb.

Qeyd edək ki, Azərbaycana qaçaqmalçılıq yolu ilə keçirilən siqaretlərin Bakıya aparılması nəzərdə tutulubmuş. Müsadirə edilən siqaretlər Lənkəran ərazi Vergilər İdarəsinə təhvil verilib. Hər iki faktla bağlı araşdırma aparılır. Axtarış tədbirləri davam etdirilir./ANS PRESS/