Ərdoğan hökumətindən Xocalı yasağı
İqtidar MHP-nin soyqırımı parlamentə çıxarmaq cəhdini İrəvanı qıcıqlandırmamaq naminə əngəllədi
Türkiyə iqtidarının Ermənistanla apardığı gizli danışıqlarda ciddi anlaşmalar əldə etmək üzrə oduğunu təsdiqləyən daha bir hadisə yaşanıb. Qardaş ölkədəki mənbələrdən daxil olan məlumata görə, Milliyyətçi Hərəkat Partiyası Xocalı soyqırımı haqda qətnamə layihəsi hazırlayıb və onu parlamentə təqdim edib. Layihənin bu gün müzakirəyə çıxarılması planlaşdırılıb. Lakin şəxsən parlamentin spikeri Köksal Toptan və xarici işlər naziri MHP rəhbərliyinə müraciət edərək israrla dövlət adına bu qətnaməni geri çəkməyi xahiş ediblər.
Mənbənin bildirdiyinə görə, yaxın günlərdə MHP başqanı Dövlət Baxçalının mətbuat konfransı keçirərək məsələ ilə bağlı açıqlama verəcəyi gözlənilir.
Türkiyə iqtidarının bu davranışı Ankaranın Ermənistanla münasibətlər qurmaq üçün Qarabağ münaqişəsinin nizamlanması şərtindən geri çəkildiyi haqda yayılan xəbərlərin fonunda baş verir. Xatırladaq ki, Azərbaycanda narahatlıq yaradan bu xəbərlər AKP hökuməti tərəfindən təkzib edilmir. Türkiyənin Bakıdakı səfirliyi isə Ermənistanla danışıqların getdiyi bir vaxtda bu xəbərlərlə bağlı şərh verməyin düzgün olmadığını açıqlamışdı.
Qeyd edək ki, MHP əvvəllər də Xocalı soyqırımını Türkiyə Böyük Millət Məclisində qaldırıb, məsələ ilə bağlı çıxışlar və müzakirələr olub. Ancaq görünür, bu dəfə AKP iqtidarının Ermənistanla apardığı danışıqlar o dərəcədə həssas mərhələyə çatıb ki, Xocalı məsələsinin parlamentdə qaldırılmasının danışıqlara zərər vura biləcəyindən ehtiyat edilir. Məhz bu səbəbdən müxalifət partiyasının Xocalı qırğınını parlamentdə qaldırmaq təşəbbüsü dövlət adına əngəllənir.
Belə görünür ki, Türkiyə iqtidarı Ermənistanla anlaşmaq və Qarabağ məsələsi həll olunmadan bu ölkə ilə diplomatik münasibətlər yaradıb sərhədləri açmaq üzrədir. Məlumatlara görə, Ankara bu addımı “erməni soyqırımı”nın ABŞ prezidenti və Konqresi tərəfindən tanınmasının qarşısını almaq üçün yaxın zamanlarda ata bilər. Bəllidir ki, hazırda ABŞ-da erməni lobbisinə yaxın olan prezident və Konqres iş başındadır. Prezident Barak Obamanın aprelin 24-də ermənilərə mesajında “soyqırım” ifadəsini işlətməsi gözlənilir. Həmçinin Konqres erməni qətnaməsini təsdiqləyə bilər. Vaşinqtondan işarə edilir ki, “soyqırım”ın tanınmasını ancaq Türkiyənin Ermənistanla diplomatik münasibətlər qurması əngəlləyə bilər.musavat
Hiç yorum yok:
Yorum Gönder