Rusiyanın müdafiə naziri Bakıya niyə gəlmişdi?

Rusiyanın müdafiə naziri Bakıya niyə gəlmişdi?


30.12.2008, 06:29

Politoloqların fikrincə, NATO-nun Azərbaycanla bağlı planları Kremli ciddi narahat edib
Rusiyanın müdafiə naziri Anatoli Serdyukovun ötən şənbə günü gözlənilmədən Bakıya səfər edərək əvvəlcə müdafiə naziri Səfər Əbiyev, daha sonra dövlət başçısı Ilham Əliyevlə görüşməsi bir sıra suallar doğurmamış deyil. Rəsmi mənbələrin açıqlamasına görə, danışıqlar zamanı ikitərəfli hərbi və hərbi-texniki sahədə əməkdaşlığın perspektivləri, həmçinin Cənubi Qafqaz regionunda təhlükəsizliyin təmin edilməsi məsələləri müzakirə olunub. Bəs görəsən, Rusiyanın müdafiə nazirinin Bakıya səfərində əsas məqsəd nə olub?
Siyasi şərhçilər hesab edir ki, A.Serdyukovun qəfildən paytaxtımıza səfər etməsi məqsədsiz deyil və sırf şimal qonşumuzun ciddi narahatlığını ifadə edir. Amma eyni zamanda o da istisna deyil ki, A.Serdyukovun Bakıya səfəri Rusiya dövlətinin bir sıra maliyyə maraqlarından da irəli gəlir. Yəni, ekspertlərin fikrincə, belə bir fərziyyə də var ki, Rusiyanın müdafiə naziri Bakıya Azərbaycanın ordusu üçün silahları Ukraynadan yox, məhz Rusiyadan almağı xahiş etmək üçün gəlib. Eyni zamanda, heç şübhəsiz Rusiya Azərbaycanın son zamanlar NATO, Türkiyə ilə əməkdaşlığından da çox narahatdır: “Ukrayna və Gürcüstan NATO ilə inteqrasiyada müəyyən irəliləyişlərə nail olublar. Bu istiqamətdə növbədə Azərbaycandır. Rusiya bunu çox gözəl bilir. Amma öz növbəsində Azərbaycan tərəfi də xarici siyasət kursunu müəyyənləşdirərkən bu məqamları nəzərə almalıdır”.
Bundan başqa, bir müddət əvvəl NATO bazasının Azərbaycanda yerləşdirilməsiylə bağlı aparılan danışıqlara da diqqət çəkən ekspertlər hesab edir ki, bu məqam da diqqətdən qaçmamalıdır: “Həm NATO-nun Azərbaycanda baza yerləşdirmək üçün axtarışları, həm amerikalı senator Luqarın açıqlaması Rusiya hakimiyyətində Cənubi Qafqazla bağlı ciddi narahatlıq yaradıb. Luqarın, ”ABŞ raket hücumundan müdafiə qurğularını yerləşdirmək üçün Azərbaycanda münasib yer axtarılır", deməsi heç şübhəsiz, Kremlin diqqətindən kənarda qala bilməzdi".
Xəyal