Azərbaycanlı türk iş adamını döyüb, 690 min dollarını mənimsədi

4 gün girov saxlanılan Müzəffər Bahara işgəncə verilib

Türkiyənin İzmir şəhərində yaşayan iş adamı Müzəffər Bahar ixrac etdiyi subtropik məhsulların pulunu almaq üçün getdiyi Rusiyada girov götürülüb.

Lent.az-ın Türkiyə mətbuatına istinadən məlumatına görə, iş adamı 4 gün girovluqda saxlanılıb, bu müddətdə ona işgəncə verilib. “Baharlar Group”un sahibi olan Müzəffər Bahar Rusiyaya 610 min dollarlıq məhsul göndərmək üçün həmin ölkənin iki firması ilə müqavilə bağlayıb. Ötən həftə məhsullar gəmi ilə Trabzondan Rusiyaya göndərilib. Malı alan firma yetkililəri pulu ödəmək üçün Müzəffər Baharı Rusiyaya dəvət ediblər.

Müzəffər Baharı Rusiyada özünü firmanın nümayəndəsi kimi təqdim edən Rauf adlı azərbaycanlı qarşılayıb. İş adamı bir anbara aparılıb, orada cibində olan 1200 dollar və pasportu əlindən alınıb, işgəncəyə məruz qalıb. 4 gün anbarda girov saxlanılan Müzəffər Bahara zorla 80 min dollarlıq borc sənədi imzalatdırıblar. Bundan sonra bir otelə aparılan iş adamı oradan yaxınlarına zəng etməyə imkan tapıb, ailəsi isə dərhal Türkiyə Xarici İşlər Nazirliyinə müraciət edib. Oteldən qaçmağa nail olan Müzəffər Bahar Rusiyadakı tanışlarının yanına gedib, sonra isə ölkəsinə qayıdıb. İş adamı bütün bunların maliyyə böhranı səbəbi ilə işdən çıxardığı adamların təşkil etdiyinə inandığını vurğulayıb.

LENT.AZ