Bu gəmi kimindir?

Bu gəmi kimindir?
Dekabrın 2-də Dardanel boğazında iki gəmi toqquşub.
Onların Azərbaycana məxsus olaraq Panama bayrağı altında üzən "Emerald 1" quru yük gəmisi və Ukraynanın "Danapris 2" yük gəmisi olduğu bildirilir.
Azərbaycan gəmisi Rusiyanın Krasnodar diyarındakı Yeysk limanına, Ukraynanın "Danapris"i isə İtaliyanın Ravenna şəhərinə üzürmüş.
"Danapris 2" quru yük gəmisinin sahibi olan "Capital Shipping Co. Ltd" şirkətindən verilən məlumatda toqquşma faktı təsdiqlənib.
"Toqquşma nəticəsində "Danapris 2" vaterxəttdən bir qədər yuxarıda göyərtəsindən zədələnib. Gəmi üzür, dənizə neft məhsulları axıntısı yoxdur. Gəminin 12 nəfərlik heyəti özünü normal hiss edir və onların aarsında xəsarət alanlar yoxdur", - şirkətin baş meneceri Viktor Niçoporçuk bildirdi.
Panama bayrağı altında üzən gəminin sahibi olan "SİO Shipping" şirkəti isə hadisə ilə bağlı heç bir açıqlama verməyib.
Türkiyənin sahil mühafizəsi katerləri hadisə yerinə yollanıblar və az sonra gəmilərin ikisi də boğazdan təhlükəsiz keçid üçün əlverişli olan bölgəyə buksirlə aparılıb.
Baş vermiş hadisə ilə bağlı araşdırma aparılır.
Xəzər Dövlət Dəniz Gəmiçiliyindən əməkdaşımıza verilən məlumatda isə bildirilir ki, "Emerald 1" gəmisi Azərbaycana məxsus deyil.
"Bizim belə gəmimiz yoxdur. Toqquşan gəminin kimə məxsus olduğunu isə bilmirik", - gəmiçilik mənsubları dedilər.
1991-ci ildə inşa edilən, dedveyti 3430 ton olan "Emerald 1" gəmisi rəsmi qeydiyyat yeri qismində Bakının göstərildiyi "SİO Shipping"in balansındadır.
"Ekspress"in dünən əldə etdiyi məlumatlara görə isə, "SİO Shipping"in "Emerald 1" gəmisinə verdiyi yük və müşaiyət sənədlərində şirkətin Azərbaycana məxsus olduğu bildirməsinə rəğmən, bu qurum Türkiyədə yerləşir.
Ofisi İstanbulun Kadıköy səmtində, Fənəryolu küçəsində yerləşən şirkətin meneceri Çətin Şaşmazər "Emerald 1"ın nə üçün Azərbaycan gəmisi kimi qələmə verildiyi barədə suallarımızı cavablamaqdan qətiyyətlə boyun qaçırdı.
"Heç nə söyləyə bilmərəm. Şirkətimizin rəhbərliyi indi burada yoxdur. Hadisə ilə bağlı bütün bilgilər əldə ediləndən sonra sizinlə danışa bilərəm", - Ç.Şaşmazər söylədi.
Türkiyə sahilləri yaxınlığında, Egey dənizində baş vermiş olayla bağlı o da bəlli oldu ki, günəbaxan tumu daşıyan "Danapris"in də sənədləri qaydasında deyil.
Hazırda Egey dənizindəki Bozcaada (Türkiyə) adası yaxınlığında lövbər atmış gəmilərdə heyət üzvlərinin ifadələri alınır.
Bizdə olan bilgilərə görə, "Emerald 1"in 8 nəfərlik heyətinin 3 üzvü azərbaycanlıdır.
Dünən həmin şəxslərlə telefon əlaqəsi yaratmağa çalışsaq da, "Emerald 1" susdu.

Həsən AĞACAN