Azərbaycan Türkiyəyə qaz nəqlini dayandıra bilər

Türkiyənin “Hürriyət” qəzeti belə bir iddia ilə çıxış edib ki, Yerevan və Ankara Bakıdan separat razılaşma əldə etsələr, Azərbaycan Türkiyəyə qaz nəqlini dayandıra bilər.

Türk nəşrinin iddiasına görə, Azərbaycan rəhbərliyi Qarabağa dair irəliləyiş əldə olunmayacağı halda Yerevan və Ankara arasında sərhədlər açılsa, Türkiyə Xəzərdən çıxan qazsız qala bilər.

Xəzərdəki “Şahdəniz” qaz yatağından çıxarılan təbii qazın istismarı və nəqli ilə bir qrup Avropa şirkətinin üstünlük təşkil etdiyi konsorsium və BOTAŞ şirkəti məşqul olur.

Müvafiq saziş 2001-ci ildə baqlanıb. Qazın nəqli barədə saziş isə 16 il müddətinə baqlanıb.

Hazırda “Şahdəniz” qazının əsas idxalçılarından biri Türkiyədir və hər il bu ölkəyə 6 milyard kubmetrdən çox qaz nəql olunur.

Azərbaycanın hər hansı səbəblər ucbatından qaz nəqlini dayandırması iddialarına gəldikdə isə, enerji məsələləri üzrə təhlilçi İlham Şaban bunu "heç bir əsası olmayan mülahizə" adlandırır.

Belə ki, sazişə əsasən, qazın sahabi Azərbaycan höküməti deyil, Norveçin Statoyl şirkətidir.

Onun sözlərinə görə, hüquqi baxımından Azərbaycan tərəfinin Türkiyəyə qazın nəqlini dayandırmaq hüququ yoxdur, Lakin hətta bu nəzəri cəhətdən təsəvvür edilsə, Bakı beynəlxalq kommersiya məhkəmələrinə verilə bilər.