NEFTİN GƏLƏN İL ÜÇÜN ORTA QİYMƏTİ AÇIQLANDI

NEFTİN GƏLƏN İL ÜÇÜN ORTA QİYMƏTİ AÇIQLANDI
ABŞ-ın Energetika Nazirliyinin proqnozlarına görə, neft gələn il orta hesabla 51 dollar olacaq, Azərbaycanın hesabına hasilat artacaq



ABŞ-ın Energetik, Nazirliyi gələn il üçün neftin orta qiymətinə dair proqnozlarını açıqlayıb. Bu proqnozlara görə, gələn il dünya birjalarında neft orta hesabla 51 dollara satılacaq.
Bu il üçün isə orta qiymətin 100 dollar həddində olacağı gözlənilir. Nazirliyin ekspertlərinin hesablamalarına görə, ABŞ-da və dünyada iqtisadi böhranın gözlənildiyindən daha ağır keçməsi neftə olan tələbatı azaldıb. Bu azalma gələn il də davam edəcək. Gözlənilir ki, bu il neftə olan qlobal tələbat sutkada 50 min barel az olacaq. Son 30 ildə ilk dəfədir ki, 3 il dalbadal neftə olan tələbat azalır. Qiymətlərin aşağı düşməsinə tələbatın azalması ilə yanaşı, OPEK-ə üzv olmayan ölkələrdə hasilatın artması da təsir edəcək. Bu təşkilata daxil olmayan ölkələrin neft hasilatının həcmi gələn il sutkada 450 min barel çox olacaq. Meksika, Şimal dənizi və Rusiyada hasilatın azalmasına baxmayaraq, Amerika Energetika Nazirliyinin ekspertləri Azərbaycan, Braziliya və Birləşmiş Ştatların özündə neft hasilatının artacağını proqnozlaşdırır.
Siyasət şöbəsi