İRANLA MİSİR ARASINDA YENİ GƏRGİNLİK YARANIB

İRANLA MİSİR ARASINDA YENİ GƏRGİNLİK YARANIB
2008-12-10 - 17:30:00


Dekabrın 9-da İranın Qahirədəki nümayəndəsi Misir Xarici İşlər Nazirliyinə çağırılıb. Misir xarici işlər naziri nümayəndəyə Tehrandakı Misir nümayəndəliyi qarşısında keçirilmiş aksiyalara və prezident Hüsnü Mübarəkə qarşı səsləndirilmiş şüarlara rəsmi etiraz bildirib.

Dekabrın 8-də İran İnqilab Keşikçiləri Korpusuna («Sepah») bağlı «Bəsic» (hökumət tərəfdarı könüllülər dəstəsi) qüvvələrinə mənsub yüzlərlə tələbə Misirin Tehrandakı nümayəndəliyi qarşısında toplaşaraq Misir, İsrail və ABŞ-a qarşı etiraz aksiyası keçirmiş, Misirin İsraillə əməkdaşlığını pisləyən bəyanatla çıxış etmiş, Misir prezidentini Qəzzə zolağında «Həmas» qrupunu mühasirəyə almaqda günahlandıraraq «Hüsnü Mübarəkə ölüm»» şüarı səsləndirmişdilər.

«Media forum» saytının məlumatına görə, xarici işlər naziri İranın Qahirədəki nümayəndəsi ilə təkbətək görüşdə İran kütləvi informasiya vasitələrində Misir hökumətinə qarşı təbliğatın aparılmasına da etiraz bildirərək hər iki ölkənin münasibətlərinə mənfi təsir göstərə biləcək bu kimi hərəkətlərin dayandırılmasını tələb edib.

1981-ci ildə qatı islamçı Xalid əl-İslambuli Misirin keçmiş prezidenti Ənvər Sədatı qətlə yetirəndən sonra Tehran küçələrinin birinə qatilin adı verilib. O zamandan iki ölkə arasında rəsmi diplomatik münasibətlər kəsilib.




«Media forum»