Güney Azərbaycanda yaşayan soydaşlarımıza səsləniş!

Əziz həmvətənlər, Güney Azərbaycanda yaşayan soydaşlarımız!

Biz yaxın çevrəmizdə azadlığa susamış insanlar üçün bir “Azadlıq çırağı” yandırdıq. Amma düşündük ki, bu çırağın işığı yalnız bizim əhatəmizi deyil, dünyanın fərqli coğrafiyalarında hüquqi cəmiyyət, qanunçuluq, vicdan azadlığı arzusunda olan başqa insanların da yolunu aydınlatmaqda bir cığır açsın. Təbii, həm məsafəcə, həm kökcə bizə çox yaxın olan - bizimlə eyni millətdən olan Araz çayının o tayındakı milyonlarla hüquqsuz Azərbaycanlı soydaşlarımızı da unutmadıq. İnanırıq ki, bu sitə sizə içində yaşadığınız bir çox sualların cavabını tapmaqda yardım edəcək.

Biz iki yüzilliyin qovşağından keçmiş indiki nəsil tarixdə böyük dəyişmələrin şahidi olduq. Biz gözlərimizlə gördük ki, dünya necə sürətlə dəyişir, zamanla imperiyalar və sərhədlər necə çökür, diktat rejimlər demokratik sistemlərlə necə əvəzlənir. Amma hələ də bu xeyirlə şərin savaşdığı ideyalar mübarizəsində öz nəcib ideallarının qurbanı olan, zorakılıqla üzləşən, söz haqqı əlindən alınan, həbsxanalara atılan milyonlarla insan o böyük, işıqlı günün gələcəyini gözləməkdədir. Yaşadığımız XXI əsrdə adi insan haqlarının müdafiəçisi olanları ağlasığmaz qeyri-insani üsullarla susduran, insanlara öz vətənlərini həbsxanaya çevirən rejimlər həqiqətən dözülməzdir və onların süquta uğrayacağı gün də uzaqda deyil.

“Tarixi qəhrəmanlar yazır “ kəlamı çox uğurlu deyilmişdir. Uzağa getmədən, sizin öz aranızdan çıxmış qəhrəmanların timsalında bu ideyaların qələbə çalacağına inanmamaq haqqımız yoxdur. Azad dünyanı “azadlıq ideyalarının yayılması manifesti” kimi qəbul edən böyük Çex dissidenti Vatslav Havelin dediklərinə əsaslansaq, o tarixi bizim indiki nəslimiz öz zəkası, açıq dünyagörüşü, dünyəvi baxışları ilə yazacaq...

Bu şərəfli tarixin yazılmasında “Azadlıq çırağı”nın işığında dünyanın bütün demokratik ruhlu insanlarının bərabər addımlayacağına inanırıq! Bunun üçün siz soydaşlarımızın təklif və fikirlərini eşitmək istərdik. Fikirlərinizi, məqalələrinizi bizə göndərin, azad düşüncə tərzinin məkanı olan “Azadlıq çırağı” (http://www.azadliqciragi.org) vasitəsilə yaya bilərsiniz.

Hörmətlə,

“Azadlıq Çırağı” işçi qrupu

http://www.azadliqciragi.org/