مركزى اوستانين توركلرله مسكون اولان بؤلگه لرى جنوبى آذربايجانا داخيلدير.
١- جنوبى آذربايجان (١) ائتنيك اولاراق (٢) ايرانين قوزئى باتىسيندا (٣) بيتيشيك شكيلده٬ (٤) ييرمينجى يوز ايلين باشيندا (٥) توركلرله مسكون اولان (٦) بوتون شهر٬ منطقه و كندلرين آدىدير. بو بوتؤو اولان ائتنيك منطقه٬ گونوموزده ايرانداكى ايدارى بؤلمه لره گؤره٬ اون ايكى اوستانين سرحدلرى ايچينده داغيديليبدير. بو اون ايكى اوستانين تورپاقلارينين هامىسى و يا بير بؤلومو گونئى آذربايجان اراضيسىدير.
٢- جنوبى آذربايجانين ائتنيك اساسا گؤره تعريف ائديلمه سى حياتى اهمييته ماليكدير. يوخسا عراقدا اولان كيمى٬ جوغرافى٬ سياسي و تاريخى اساسلارا گؤره تعريف اولان آذربايجان-كى فارس قومييتچىلرينين تعريفى ده بونلاردير- جنوبى آذربايجان تورپاقلارينين تكجه دؤردده-اوچده بيريندن (شرقى و غربى آذربايجانلاردان) تشكيل تاپير٬ اردبيل٬ زنجان٬ همدان٬ قزوين ايله تئهران٬ قوم٬ گيلان٬ كوردوستان و كيرمانشاه اوستانلارينين توركلرله مسكون اراضىسينى اؤز ايچينه آلمير و بورالارى آذربايجاندان آييرير. بوگون تاريخى آذربايجان خريطه و سرحدلرى عملده بيزيم درديميزه دگمز٬ چونكو تاريخى آذربايجانا٬ ائتنيك آذربايجان تورپاقلارينين ياريسيندان چوخو٬ حتتا زنجان بئله داخيل دئييلدير. بو گون ايراندا گئرچكليك بوندان عيباتدير كى گله جك فئدئرال دؤولتلرين سرحدلرى تكجه ائتنيك سرحدلره گؤره جيزيلابيلر. و نتيجه ده ائتنيك آذربايجان خريطه سى٬ عئينى حالدا گئرچك آذربايجانين خريطه سىدير.
٣- جنوبى آذربايجان تورپاقلارينى دا ايچينه آلان اوستانلاردان بيرى٬ اونون ان گونئى دوغو بوجاغينى تشكيل وئره ن٬ مركزى اوستاندير. بورا ايدارى تقسيماتا گؤره "مركزى استان" آدلانسا دا٬ اونون تورپاقلارينين بؤيوك بير بؤلومو ايراندا تورك خالقينين ياشاديغى بؤلگه لر اساس آليناندا٬ تئهران٬ قوم و همدان اوستانلارى ايله بيرليكده٬ ايرانين مركزى يوخ٬ قوزئى باتى توركلويو و يا گونئى آذربايجانا داخيلدير. (مركزى يا دا اورتا ايران توركلرى دئييله نده ايسه آماج٬ ايصفاهان٬ چاهارماحال٬ لوريستان٬ يزد و سيمنان اوستانلارى قصد ائديلير. جنوبى ويا گونئى ايران توركلويوندن آماج فارس٬ كيرمان٬ خوزيستان٬ بوشئهر ... اوستانلاريدير).
٤- مركزى اوستانين توركلرله مسكون بؤلوملرى٬ آذربايجانين ان آغير فارسلاشديرما سياستينه معروض قالميش بؤلگه لريندن بيريدير. بورا هم يئرلى توركلر و هم آذربايجانين و ايرانين باشقا بؤلگه لرينده كى يازار٬ آيدين و .... لارين ديققت و ايلگيسينه مؤحتاجدير.
٥- مركزى اوستانين جنوبى آذربايجانا عاييد اولدوغو و ايدارى تقسيماتدا بورايا باغلانماسى ضرورتى٬ بورادا مدرسه لرده توركجه تدريساتين باشلاديلماسى٬ توركجه درگى و توركجه شئعر٬ ادبى٬ عاشيق٬ موسيقى درنكلرين قورولماسى٬ قزئتلرين چاپ ائديلمه سى٬ آتا آنالارين اوشاقلارينا توركجه اؤيره تمه لرى٬ شهردارلاردان خيبابانلارا توركجه آدلار قويولماسينى٬ توركجه تابلولار و ... يازيلماسينى ايسته مه لرى٬ يئرلى رادييو تئلئويزييوندان توركجه پروگراملارين يايينلانماسى و .... كيمى ايستكلر سيخجا و يوكسك سسله ديله گتيريلمه ليدير.
كوميجان سايتلارى٬ محمد كميجانى
سون دؤورلرده ايران توركلويو و خوصوصى ايله گوئنى آذربايجان توركلرى آراسيندا اؤزونه قاييديش و كيميلك آختاريشى آخيمينين يئيينليك قازانماسى٬ گئنيشله مه سى و درينله شمه سى ايله بيرليكده٬ بورالارا عاييد و يا بورالار حاققيندا يازىلار و يئنى سايت-وئبلاگلارلا قارشيلاشماق مومكوندور. بونلاردان بيرى٬ كوميجان وئبلاگلارى سئريسي و كوميجان تعزييه وئبلاگىدير.
كوميجان وئبلاگلار سئرىسى حؤرمتلى بيلگين محمد كميجانى طرفنيندن حاضيرلانير. بو وئبلاگلار سئرىسى كى تاريخ و جغرافياي كميجان٬ فرهنگ و آداب و رسوم كميجان٬ ايل هاي برچلو و بزچلوي كميجان٬ تعزيه خواني در كميجان٬ انساب و طوايف كميجان٬ تغذيه مصنوعي باستاني كميجان٬ چهره هاي نامداركميجان٬ شهداي كميجان٬ مشهدي تقي جاويد٬ عراقي شاعر عارف و نامدار كميجان دان تشكيل تاپير٬ سؤزون گئرچك معناسيندا بير آنسيكلوپئدىدير. بو آنسيكلوپئديك سئريده جنوبى آذربايجانين مركزى اوستانى تركيبينده قالان بؤلوملرينه داخيل اولان كوميجان و بورچالى-بوزجالى طايفالارى و ماحالى حاققيندا چوخ گئنيشجه٬ ماراقلى و يئنى بيلگيلر سونولماقدادير. من بورادا خوصوصىيله تورك كولتورو و فولكلورو ايله توركلوك بيليمى و آذربايجان بيليمى آچيلاريندان سون درجه اؤنه ملى اولان "تاريخ و جغرافياى كميجان"٬ "فرهنگ و آداب و رسوم كميجان"٬ "ايل هاى برچلو و بزچلوى كيمجان"٬ "تعزيه خوانى در كيمجان" وئبلاگلارينين آدينى بير يول داها آپارماغى واجيب بيليره م.
كوميجاندان عاشورا آغيتلارى
"تعزيه خواني هنر نمايشي كميجان" آدلى وئبلاگدا جنوبى آذربايجانين بو بؤلگه سينده تعزيه مراسيمى و صنعتى حاققيندا هر طرفلى و چوخلوجا بيلگى وئريلير. بو بؤلومون باشليقلارينين توركجه چئوريريلرى بئله دير: آغيت نوسخه لرى٬ آغيت آراجلارى٬ گؤرونمز گوجلر٬ حرمين ائو اهلى٬ حرمين قادين و اوشاقلارى٬ آغيتين باشلما و بيتمه سى٬ آواز و موسيقي٬ تعزييه ده حئيوان و ييرتيجى حئيوانلار٬ دين آداملارى ايله موجتهيدلرين آغيتلار حاققينداكى گؤروشلرى٬ آغيت قوشوقلارى٬ ٢٥ لى ايله شمه لر- اوتوروملار٬ تعزييه كيتابى بكاء الباصرين٬ محررم ياسى تؤره نلرى٬ كوميجاندا محررم٬ قوشوقچولارين قوشوقلارى و ذاكيرلره اوياريلار٬ موللا احمد و مولا اسدوللاه و كاتيبين اؤزلرى حاققيندا سؤيله ديكلرى قوشوقلار٬ ايمام حوسئين مؤعجوزه سى٬ خالق اينانج و اينانيشلارى٬ كوميجانين ايمام خومئينى حوسئينييه سى٬ كوميجان شهيدلرينى آنما٬ رحمتليك حور ديليندن زنجير دؤومه نوحه سى. هابئله بو مراسيمله علاقه لى بو ايكى آدرئسده چوخ ماراقلى عكيسلر تقديم ائديلير: بيرينيجى آدرئس٬ ايكينجى آدرئس
Hiç yorum yok:
Yorum Gönder