آذربایجانین معاصیر تاریخینه باخدغیمیزدا،مشروطه دن تخمینا 15 ایل داها اول باش وئرن ، "رژی" معاهیده‌سینین علیهینه اولان اعتراضلارین باشیندا، تبریز شهرینده‌کی باش وئرن عصیانلار دوروب دور. (بو معاهیده‌یه اساسا توتون و تنباکی ینین آلیم ساتیمی یانلیز انگیلیسین رژی کوماپانیسینه وئریلمیشدیر.). بو اعتراضلارین نه قده‌ر بؤیوک اولودوغونو، تکجه تبریزده 4 مین سیلاحلی اینسانین یورویوشونده، ائله‌جه‌ده "امین السلطانین" شکیلین بو شهرده ایتلرین بویوندان آسماسی تصدیقله‌ییر. بو معاهیده نی "ناصرالدین شاه" گیزلی‌جه ایمضا لامیشدیر. آمما بو زیان وئریجی معاهیده نین اوستون آچان و ایلندیرن، "اختر" قزئتی اولموشدور. بو قزئت، کؤکوـ کؤمجی آذربایجاندان اولان آمما استامبولدا یاشایان ضیالی لریمیز طرفیندن یازیلیب ایرانین باشا باشیندا، باشدا تبریز اولماقلا یاییلیردی. چکینمه‌دن دئمک اولار کی اختر قزئتینین بو آیدینلیق وئرمه‌لری اولماسایدی بو بویدا عصیان لارا، تبریز باشچیلیق ائده بیلمزدی. چونکو هر اینقیلابین تمل داشین آیدینلانماق قویور. داها سونرالار باش وئرن مشروطه، خیابانی و پیشه‌وری حرکتلرینین شعور یاپی سین(زیرساختار شعوری)، قزئت لر و یازیلار یارادا بیلمیشدیرلر. بو قزئت لرین ایستر قوزئی آذربایجاندا، ایستر گونئی آذربایجاندا، ایسترسه‌ده آنادولودایازیلیب یاییلماغیندان آسیلی اولمایاراق آذربایجانلیلارین شعور چیچکلنمه‌سینده چوخ بؤیوک رول اوینا بیلمیشدیرلر. بورادا یانلیز، بو قزئت‌لرین بیر ئچه‌سینین آدینی چکمه‌کله کیفایتله‌نیب، سؤزو اوزاتماق ایسته‌مزدیم. "ملانصرالدین"،" ایران نو"،"آذرآبادگان"، "تجدد"، " بیرق عدالت"،"حریت"،"یولداش"،"تکامل"،"آژیر"،"یومروق" و...
بو قزئتلر بیر کؤرپو اولوب، میرزا جلیل ممد قلیزاده، محمد امین رسولزاده،طالبوف تبریزلی، ماراغالی زین العابدین، میرزا تقی خان رفعت، شیخ محمد خیابانی، سید جعفر پیشه وری و باشقالاری کیمی داهی شخصیتلرین، میللی و مودرن دوشونجه لرین میللتیمیزه چاتتیراراق، بو فیکیرلری کوتله‌وی‌لشدیره بیلمیشدیلر.
بیر داها خاطیرلاتمالییام کی بیر توپلومون دوشونور(متفکر)لرینین سایسی و یا بیلگی‌سی نه‌قده‌ر چوخ اولماغی، توپلومو آلت اوست ائده بیلمه‌یه‌جک، مگر اونلارین فیکرینی یاییب کوتله‌وی لشدیره‌نه قده‌ر.
آمما ایران ایسلام اینقیلابیندان سونرا، آذربایجاندا باش وئرن ان بؤیوک عصیانلارین باشیندا، 1385 نجی گونش ایلینده باش وئرن خرداد حاثه‌لری دورور. بو حرکتلر،آنجاق بیر تحقیرائدیجی کارکاتورا اعتراض دیر دئیه باشدان سوودو ائتمک هئچ ده اینصافدان دئییل. خرداد حادثه‌لری، آذربایجاندا داها اوللر باش وئرن اینقیلابلارین دوامی ساییلیر. بو حرکت، منفور دوشمنین" پیشه‌ورینین حکومتین ییخیب، دیللرینی ده یاساق لادیق. هر نه قورتولدو" دئیه سؤزلرینی بیتؤولوکله بوشا چیخارتدی.
1325 تا1357 قده‌ر، سهند(بولود قاراچورلو) دن باشقا او سویه یه چاتا بیه‌جگی میللی بیر اینسان یئتیشه بیلمه میشدی. اما 1357 اینقیلابیندان سونرا "وارلیق" و "دیلماج" و .... قزئتلر، 1325 سوسدورولماسینین، اومود ایشیغی ساییلیریلار. آمما بو قزئت‌لرین، گونئی ده میللی شعوری یئتیشدیریب توپلومو چاخالایا بیه‌جک گوجلری یوخ ایدی.
بیر طرفدن ده فارس شوونیستی رادیو، تلویزیون، وب‌و ... کیمی مدیا لاردان فایدالانیب ایستدیکلری قده‌ر بیزی اریدیب، آرادان آپارماغی باشارا بیلمیشدیلر. گونئی آذربایجانین سون نفسلرینده، دده قوقوت سایاغی، بابک سایاغی بیر کانال بیزی اوچورومون آغزیندان قورتاماغی باجاردی.
میللتیمیز بو کانالین دیرلی و چئشیدلی یایینلاریندان، فایدالانیب گونتای جوانشیر، سلیئمان اوغلو،دکتر ضیا صدر و بیر چوخ بیلیم آداملاریمیزین فیکیرلرین منیمسه ییب، بلکه دئیردیم بو کانالین واسیطه‌سی‌ایله میللی شعوردان یئتکینلشدیلر. 1 خرداد دا سسلنن شعارلار، تورکجه آدلارین چوخالماسی، توی لاردا دوگونلرده یانلیز تورکو موسیقیلرینین سسلنیلمه‌سی، تبریزده، خوجالی سوی قیریمینا اعتراض، 21 آذر گونو تبریز و باشقا شهرلرده، نئچه ساعت لیق دا اولموش اولسا آذربایجانین شانلی بایراغینین دالغالانماسی و... کیمی اولایلارین یارادانی گوناز تی وی اولموشدور.
بو گون گونئی آذربایجانا، فارس شوونیزمیندن داها بؤیوک تهلوکه، کوردلرین باتی آذربایجانی(آذربایجان غربی) اؤزومکولشدیرمک ایستیقامتینده آپاردیقلاری بیر تورلو ایشلر دیر.کرکوک حادثه‌لریندن جدی بیر درس آلمادیغیمیز تقدیرده ،کورد تروریستلری طرفیندن تورپاقلاریمیز ایشغال اولاجاق. کوردلرین چیزدیکلری خریطه هئچ ده ظرافات دئییل...
بئله بیر دورومدا اورتادا، یارایا بیله‌جک تک بیر فیکیر وار اودا تورکست ده گونئی آذربایجانین همه‌شلیک بیر کانالینین اولماسی دیر. چونکو گونئی ده، تلستار12 مسیری چتینلیکله توتولور و اوندان داها بؤیوک پروبلئم تلستار و هات برد مسیرلرینه، ایران طرفیندن پارازیتلرین بوراخیلماسی‌دیر.
آذربایجانلیلار اوچون تورکست ده ادبی، کولتورل، مدنی بیر کانالین اولماسی،گونئی آذربایجانین میللی حرکتینین دیشاریدا چیرپینان اوره‌گیدیر. بئله بیر کانالین تورکستده قالماسینا، تورکیه دؤولتی طرفیندن یانلیز سیاسی وئرلیشلرین اولماماسی شرطی‌ایله اذین وئریلیر. چونکو سیاسی یایینلار، ایران و تورکیه آراسینداکی سیاسی ایلیشگیلری پوزا بیلر و ایران دا قارشیلیق دا، کورد تروریستلری ایله(پژاک) لا ایش بیرلیگی آپاریب، تورکیه نین ایچ ایشلرینده مداخله ائده‌ر.
تورکستده یاییلا بیلن کولتورل و ادبی بیر کانال، اولا بیلسین یاخین مدتتده چوخ بؤیوک اوغورلار(گؤزه چارپان باشاری لار) قازانا بیلمه‌سین آمما میللی حرکته اوزاق مدتتده چوخ بؤیوک باشاری لار قازانا بیلر. منجه بو گون میللی حرکتین شعور و بیلگی یاپیسن اولدوقجا گوجلندیر مه‌لییک. سؤزومون سونون حوسئین جاویدین شعری ایله بیتیریب میللی حرکته اوغورلار دیله‌ییرم.
تورانا قیلیجدان داها کسگین اولو قووت
یانـــــــــلیز مدنیت، مدنیت، مدنیت
تبریز 23/05/1386
تبریزلی چاغداش
Kaydol:
Kayıt Yorumları (Atom)
Hiç yorum yok:
Yorum Gönder